भाजपने मनसेचा नाद सोडला!

अनेकदा प्रयत्न करूनही मनसे अध्यक्ष राज ठाकरे यांनी प्रतिसाद न दिल्याने भाजपने मनसेचा नाद सोडला आहे. आगामी निवडणुका भाजप, शिवसेना व रिपब्लिकन पक्ष युतीनेच लढविण्याच्या दृष्टीने भाजपने तयारी सुरू केली आहे आणि रिपब्लिकन पक्षाला सांभाळण्यासाठी प्रयत्न केले जाणार आहेत. मनसेच्या नादी फारसे न लागता युतीच्या विजयासाठी जोरदार प्रयत्न सुरू करण्याच्या सूचना भाजपचे राष्ट्रीय अध्यक्ष राजनाथसिंह यांनी पक्षनेत्यांना मंगळवारी दिल्या.
राजनाथसिंह यांनी महाराष्ट्र, गुजरात, कर्नाटक, दादरा-नगरहवेली आणि दीवदमण येथील पक्षस्थितीचा आढावा घेतला.  महाराष्ट्रातील तयारीसंदर्भात गोपीनाथ मुंडे आणि प्रदेशाध्यक्ष देवेंद्र फडणवीस यांनी राजनाथसिंह यांना माहिती दिली. मनसेचा समावेश महायुतीमध्ये झाला, तर मतांची विभागणी होणार नाही. त्यासाठी नितीन गडकरी, मुंडे यांच्यासह भाजपच्या काही नेत्यांनी अनेकदा आवाहन केले. पण राज ठाकरे यांनी प्रतिसाद न देता जाहीरपणे टीकास्त्र सोडले. त्यामुळे यापुढे मनसे युतीमध्ये येण्याची शक्यता नाही, हे गृहीत धरून प्रत्येक मतदारसंघात तयारी सुरू करावी, अशा सूचना राजनाथसिंह यांनी दिल्याचे सूत्रांनी सांगितले.
रिपब्लिकन पक्ष युतीत टिकून रहावा, यासाठी भाजप प्रयत्नशील आहे. त्यासाठी राज्यसभेची एक जागा अन्य राज्यांमधून देता येईल का, याची चाचपणी केली जाणार आहे. दरम्यान, भाजप -शिवसेना-रिपब्लिकन युतीचा प्रचार करण्यासाठी नरेंद्र मोदी यांच्या चार सभांचे आयोजन राज्यात केले जाणार आहे.