मुंबई : केंद्रीय माध्यमिक शिक्षण मंडळातर्फे (सीबीएसई) घेण्यात येणारी केंद्रीय शिक्षक पात्रता परीक्षेची (सीटीईटी) तारीख जाहीर करण्यात आली असून ही परीक्षा ८ फेब्रुवारी २०२६ रोजी देशातील १३२ शहरांमध्ये होणार आहे.
शिक्षक होण्यासाठीची टीईटी किंवा सीटीईटी यातील कोणतीही परीक्षा उत्तीर्ण होणे आवश्यक असते. त्यानुसार राज्य परीक्षा परिषदेतर्फे राज्यस्तरावरील शिक्षक पात्रता परीक्षेचे (टीईटी) आयोजन केले जाते. तर सीबीएसईतर्फे राष्ट्रीय पातळीवर सीटीईटी ही परीक्षा घेण्यात येते.
सीबीएसईतर्फे वर्षातून दोन वेळा परीक्षेचे आयोजन केले जाते.सीबीएसईने सीटीईटीचे वेळापत्रक जाहीर केले असून ८ फेब्रुवारी २०२६ रोजी सीटीईटीचा पेपर १ आणि पेपर २ होणार आहे. एकूण २० भाषांमध्ये ही परीक्षा घेतली जाणार आहे.
परीक्षेबाबतची सविस्तर माहिती, अभ्यासक्रम, पात्रता, परीक्षा शुल्क, परीक्षा केंद्रे असलेली शहरे याबाबतचा तपशील स्वतंत्रपणे जाहीर केला जाणार आहे. इच्छुक उमेदवारांनी https://ctet.nic.in या संकेतस्थळाला भेट द्यावी, असे आवाहन सीबीएसईकडून करण्यात आले आहे.
