चिकन आणि मासे विक्री करणाऱ्यांची आतापर्यंत स्वच्छता या दृष्टिकोनातून तपासणी होत होती. परंतु २००७नंतर पहिल्यांदाच विक्रेते वा रेस्तराँतील चिकन आणि मासे यांचे नमुने प्रयोगशाळेत तपासणीसाठी पाठविले जाणार आहेत.प्रशासनाच्या प्रयोगशाळेत आतापर्यंत अशी तपासणी न झाल्याने सुविधांचा अभाव असल्यामुळे खासगी प्रयोगशाळेत हे नमुने तपासणीसाठी पाठविले जाणार आहेत. राज्यभरातील चिकन व मासे विक्री करणाऱ्यांच्या नमुन्यांची अचानक तपासणी करण्याचा निर्णय अन्न व औषध प्रशासनाने घेतला आहे. आतापर्यंत अशी तपासणी गेल्या १५ वर्षांत झाली नव्हती. त्यामुळे विद्यमान आयुक्त अभिमन्यू काळे यांनी हे आदेश देताच अधिकाऱ्यांमध्येही चुळबूळ सुरू झाली.
हेही वाचा >>>मुंबई: कोऱ्या धनादेशावर स्वाक्षरी घेऊन वृद्ध महिलेची फसवणूक; आरोपीला पोलिसांकडून अटक
राज्यात तसेच विविध शहरांत चिकनची विक्री दुकानातून तर मासेविक्री रस्त्यावर केली जाते. या विक्रेत्यांनी किमान स्वच्छता राखावी अशी अपेक्षा असते. या विक्रेत्यांची तपासणी करताना प्रशासनाच्या निरीक्षकांकडून फक्त तीच पाहणी केली जाते. मात्र चिकन व मासे यांचे नमुनेही तपासले पाहिजेत, अशी कायद्यातच तरतूद आहे. परंतु तसे केले जात नव्हते. विकले जाणारे चिकन वा मासे खाण्यायोग्य आहेत का याची तपासणी केली जाणेही आवश्यक असल्यानेच हे आदेश देण्यात आल्याचे काळे यांनी सांगितले. चिकन वा मासे मग ते कुठल्याही दुकानात वा रेस्तराँतून विकले जात असतील तर ते आरोग्याला अपायकारक नाहीत ना याची तपासणी केली जाणार आहे, असे काळे यांनी सांगितले.
हेही वाचा >>>मुंबई: आशियातील सर्वात मोठया झोपडपट्टीची सफर; ‘धारावी बॅंक’ प्रेक्षकांच्या भेटीला
हे नमुने घेण्यासाठी मायक्रोबायोलॅाजिस्ट हवा, अशी कायद्यात तरतूद असल्याचे प्रशासनाच्या अधिकाऱ्यांनी आयुक्तांच्या लक्षात आणून दिले. मात्र अन्न व औषध प्रशासनात नियुक्त झालेले अधिकारी हे असे नमुने घेऊ शकतात, असे आयुक्तांनी स्पष्ट केले. आता ही अचानक तपासणी कोणत्याही क्षणी सुरू होणार आहे.
