मुंबई : ‘डान्सबारवरून गृहराज्यमंत्री योगेश कदम यांच्यावर टीका होत असतानाच उपमुख्यमंत्री एकनाथ शिंदे यांनी कदम यांचे समर्थन करून निर्लजपणाचा कळस गाठला आहे. जनाची नाही तर मनाची तरी बाळगावी, ’ अशी टीका काँग्रेसचे प्रदेशाध्यक्ष हर्षवर्धन सपकाळ यांनी केली. रविवारी खेडमध्ये झालेल्या कार्यक्रमात शिंदे यांनी डान्सबरवरून टीकेचे धनी झालेल्या योगेश कदम यांना अभय दिले होते.
गृहराज्यमंत्री योगेश कदम यांच्या आईच्या नावाने मुंबईतील कांदिवलीमध्ये ‘सावली’ नावाचा डान्सबार सुरू होता. या डान्सबारवर पोलिसांनी छापा टाकला, या डान्सबारमध्ये सर्व नियमांचे उल्लंघन करण्यात आल्याचे ‘एफआयआर’मध्ये नमूद केलेले आहे. हा डान्सबार आपल्या पत्नीचा नावाने आहे याची कबुली गृहराज्यमंत्री योगेश कदम यांचे वडील माजी मंत्री रामदास कदम यांनी दिली आहे.
असे असताना उपमुख्यमंत्री एकनाथ शिंदे या डान्सबारचे समर्थन कसे काय करत आहेत? हिंदुत्वाच्या विचारासाठी उठाव केला म्हणणाऱ्या शिदेंनी डान्सबारमध्ये मुली नाचवणे कोणत्या हिंदुत्वात बसते. हा कसला विकास व कोणाचा विकास आहे? असा सवालही सपकाळ यांनी केला आहे.
‘काँग्रेसच्या इशाऱ्यावर नाचणाऱ्यांनी डान्सबारवर बोलू नये’, असे म्हणणारे एकनाथ शिंदेच भाजपाच्या इशाऱ्यावर कठपुतलीसारखे नाचत आहेत. विलासराव देशमुख यांच्या नेतृत्वाखालील काँग्रेस आघाडी सरकार असताना तत्कालीन गृहमंत्री आर. आर. पाटील यांनी राज्यातील डान्सबारला बंदी केली होती याची एकनाथ शिंदे यांनी माहिती घ्यावी आणि मगच काँग्रेसवर बोलावे.
लाखो लोकांचे संसार उद्धवस्त करणारी डान्सबार संस्कृती हवीच कशाला?, एकीकडे लाडक्या बहिणींचा भाऊ म्हणून मिरवता आणि त्याच बहिणींचे संसार मोडीत काढणाऱ्या डान्सबारचे समर्थन कोणत्या तोंडाने करता? गृहराज्यमंत्री योगेश कदम यांची मंत्रीमंडळातून हकालपट्टी झालीच पाहिजे. मुख्यमंत्री देवेंद्र फडणवीस यांनीही एकनाथ शिंदे यांच्या विधानावर खुलासा करावा, अशी मागणी सपकाळ यांनी केली.
