राज्यात शिवसेना-भाजपा पुन्हा एकत्र येणार? देवेंद्र फडणवीसांचं सूचक वक्तव्य, म्हणाले…!

कुणाच्या भेटीगाठी झाल्या, कल्पना नाही!

शिवसेना खासदार संजय राऊत आणि भाजपा आमदार आशिष शेलार यांची भेट झाल्याची चर्चा सुरू असून संजय राऊतांनी ही चर्चा फेटाळली आहे. याविषयी फडणवीसांना पत्रकारांनी विचारले असता “कोणाच्या भेटीगाठी झाल्या, याविषयी मला कल्पना नाही. अधिकृतपणे भाजपा, सेना किंवा कुणाचीही भेटगाठ नाही किंवा चर्चा नाही. भाजपा सक्षम विरोधी पक्ष म्हणून काम करतोय. जनतेच्या आशा पूर्ण करण्यासाठी कोणत्याही स्तरावर जाऊन जनतेसाठी लढा देण्याची आमची तयारी आहे”, असं फडणवीस म्हणाले आहेत.

“आमचा काही धुऱ्याचा वाद नाही!”

दरम्यान, सेना-भाजपा एकत्र येण्याची शक्यता फडणवीसांनी स्वीकारली नसली, तरी फेटाळली देखील नाही. “आमच्यात कधीही शत्रुत्व नव्हतं. आम्ही शत्रू नाही. आमचे वैचारिक मतभेद झाले कारण आमचा हात सोडून आमच्यासोबत निवडून आलेले आमचे मित्र ज्यांच्याविरुद्ध निवडून आले, त्यांचा हात पकडून निघून गेले. त्यामुळेच मतभेद निर्माण झाले. पण तो काही धुऱ्याचा वाद नाहीये की सुधीरभाऊंचा धुरा उद्धवजींच्या धुऱ्याला लागून आहे आणि त्यांनी यांच्या धुऱ्यावर अतिक्रमण केलं असं नाहीये. त्यामुळे आमचं कुठलंही शत्रुत्व नाहीये. वैचारिक मतभेद तर आहेच”, असं फडणवीस म्हणाले.

“सरकारचा चेहरा उघडा पाडल्याशिवाय राहणार नाही”, देवेंद्र फडणवीसांचा ठाकरे सरकारवर निशाणा!

राजकारणात जर-तरला अर्थ नसतो!

यावेळी शिवसेना आणि भाजपा एकत्र येण्याच्या मुद्द्यावर थेट प्रतिक्रिया न देता देवेंद्र फडणवीसांनी सूचक विधान केलं आहे. “राजकारणात जर-तरला अर्थ नसतो. परिस्थिती जशी येते, त्यानुसार निर्णय होत असतात. जर-तरवर जे राजकारणी राहतात, ते स्वप्नच पाहात राहतात”, असं फडणवीस म्हणाले आहेत.