राज्यसभेसाठी शिवसेनेच्या धूत यांची हॅटट्रिक!

मनोहर जोशी यांची इच्छापूर्ती नाहीच
‘व्हिडिओकॉन’ उद्योगसमुहाचे राजकुमार धूत यांना शिवसेनेने राज्यसभेसाठी लागोपाठ तिसऱ्यांदा संधी दिली आहे. लोकसभा नसेल तर निदान राज्यसभा द्या, अशी विनवणी करणाऱ्या मनोहर जोशी यांची इच्छापूर्ती ‘मातोश्री’ कडून होणार नसल्याचे स्पष्ट झाले.
धूत यांना २००२ आणि २००८ मध्ये शिवसेनेने राज्यसभेवर पाठविले होते. आताही शिवसेनेने त्यांना संधी दिल्याने धूत यांची हॅटट्रिक पूर्ण झाली आहे. शिवसेनेचे भारतकुमार राऊत आणि धूत हे दोन सदस्य निवृत्त होत आहेत. संख्याबळानुसार शिवसेनेचा एक सदस्य निवडून येऊ शकतो. शिवसेनेने राऊत यांच्या नावाचा विचार केला नाही. मात्र धूत यांच्यासारख्या बडय़ा उद्योगपतीला रिंगणात उतरविले आहे. मुकेश पटेल, चंद्रिका केनिया, प्रितीश नंदी यांच्यासारख्या पक्षात सक्रिय नसलेल्यांना शिवसेनेने राज्यसभेवर पाठविले आहे. धूत यांना तिसऱ्यांदा संधी दिल्याने शिवसेनेने बडय़ांना राज्यसभेवर पाठविण्याची परंपरा पुढे सुरू ठेवली. धूत यांना तिसऱ्यांदा राज्यसभेवर पाठविण्यात येत असले तरी पक्षात अपवादात्मक परिस्थितीत ते सक्रिय असतात, अशी टीका शिवसैनिकांकडूनच केली जाते.
धूत यांनी शिवसेना नेत्यांच्या उपस्थितीत उमेदवारी अर्ज दाखल केला. धूत यांनी अर्जासोबत सादर केलेल्या प्रतिज्ञापत्रात १९ कोटींची मालमत्तेची माहिती दिली आहे.

राज्यसभा बिनविरोध ?
सातव्या जागेसाठी चुरस होण्याची शक्यता असली तरी एकूण रागरंग बघता ही निवडणूक बिनविरोध होईल, अशी चिन्हे आहेत. सुमारे ४२५ कोटींची मालमत्ता दर्शविणारे बडे उद्योगपती संजय काकडे हे साऱ्या तयारीनिशी रिंगणात उतरले आहेत. दोन वर्षांपूर्वी शरद पवार यांच्या मध्यस्थीने त्यांनी माघार घेतली होती. यंदा राष्ट्रवादीने काकडे यांच्यासाठी फिल्डिंग लावली आहे. शिवसेना, भाजपची अतिरिक्त मते तसेच मनसेची १२ मते या जोरावर िरगणात उतरण्याचा मनोहर जोशी यांचा प्रयत्न होता. पण शिवसेनेने अतिरिक्त मते काकडे यांच्या पारडय़ात घालण्यावर भर दिल्याचे समजते. राज्यसभेसाठी खुल्या पद्धतीने मतदान असल्याने घोडेबाजाराला फारसा वाव नव्हता. फक्त अपक्षांना गुप्त मतदान करता येते. काकडे यांनी १० अपक्ष आमदारांच्या अनुमोदक म्हणून स्वाक्षऱ्या घेऊन यंदा सारी तयारी केल्याचे सूचित केले. आणखी एखादा ‘बडा’ उमेदवार आठवा म्हणून रिंगणात उतरला तरच निवडणूक होईल. अन्यथा ही निवडणूक बिनविरोध होईल.