लालबाग परिसरामधील वन अविघ्न पार्क या आलिशान इमारतीला आज दुपारी १२ च्या सुमारास भीषण आग लागली. ही आग विझवण्यासाठी अग्निशामन दलाच्या अनेक गाड्या घटनास्थळी रवाना झाल्या आहेत. ही आग लेव्हल तीनची असल्याचं सांगण्यात येत आहे. दरम्यान, मुंबईच्या महापौर किशोरी पेडणेकर यांनीही या घटनेबाबत प्रतिक्रिया दिली आहे. यावेळी महापौरांनी घटनास्थळी तात्काळ दाखल होत त्यांनी परिस्थितीची पाहणी केली. यानंतर या घटनेबद्दल बोलताना पेडणेकर म्हणाल्या, ही आग कशामुळे लागली याबद्दल नक्की काही कळलं नाही. तो व्यक्ती ज्यावेळी इमारतीला लटकत होता, तेव्हा थोडी समयसूचकता दाखवली असती, तो पडू नये याची काळजी घेतली असती तर त्याचा जीव वाचला असता. ही व्यक्ती या इमारतीतलाच एक कामगार होता. हेही वाचा - लालबागमधील ‘वन अविघ्न पार्क’ला भीषण आग; १९ व्या मजल्यावरुन पडून सुरक्षारक्षकाचा मृत्यू वन अविघ्न पार्क ही इमारत भारत माता चित्रपटगृहासमोर आहे. लालबागमधील सर्वात उंच इमारतींपैकी एक असणारी ही इमारत ६० मजल्यांची असून १९ व्या मजल्यावर आग लागली आहे. आग लागल्यानंतर काहींनी खाली उड्या मारल्याची दृष्यही समोर आल्याचं एबीपीने दिलेल्या वृत्तात म्हटलं आहे. एक व्यक्ती गॅलरीला लटकून जीव वाचवण्याचा प्रयत्न करत असतानाच खाली पडल्याचंही दिसून आलं आहे. पडलेली व्यक्ती सुरक्षारक्षक असल्याची माहिती समोर आली आहे. स्थानिक आमदार अजय चौधरींनी ही प्राथमिक माहिती दिली आहे. पाचव्या माळ्यावर आग लागल्यानंतर ती पसरली आणि १९ व्या माळ्यापर्यंत पोहोचल्याचं सांगितलं जात आहे.