मुंबई : घाटकोपरमधील एल.बी.एस. मार्गावर शनिवारी सकाळी भरधाव वेगात धावणारी मोटारगाडी दुभाजकाला धडकून काही दुकानांवर जाऊन आदळली. या अपघातात पदपथावर झोपलेले तिघे जखमी झाले असून जखमींवर घाटकोपरमधील राजावाडी रुग्णालयात उपचार सुरू आहेत.
घाटकोपरमधील एल.बी.एस. मार्गावरील महापालिकेच्या पाणीपुरवठा विभागाच्या कार्यालयाजवळ शनिवारी सकाळी ७ च्या सुमारास ही घटना घडली. भरधाव वेगात आलेली एक मोटारगाडी अचानक विरुद्ध दिशेने येऊन दुकानाच्या पायऱ्यांवर धडकली. यावेळी येथील पदपथावर तिघे झोपले होते. मोटारगाडीची धडक बसल्याने हे तिघे गंभीर झाले. स्थानिकांकडून घटनेची माहिती मिळताच तत्काळ पोलिस घटनास्थळी दाखल झाले आणि त्यांनी जखमींना घाटकोपरमधील राजावाडी रुग्णालयात दाखल केले. तिघांवर अतिदक्षता विभागात उपचार सुरू आहेत.
घटनास्थळी प्रत्येक्षदर्शीनी दिलेल्या माहितीनुसार भरधाव वेगात धावणाऱ्या मोटारगाडीत दोन तरुणी आणि एक तरुण होता. तिघेही मद्यधुंद असल्याचा संशय स्थानिकांनी व्यक्त केला आहे. अपघातानंतर घाटकोपर पोलिसांनी तिघांना ताब्यात घेतले असून याप्रकरणी पोलिस अधिक तपास करीत आहेत.
