हिंदी आणि तामिळ चित्रपटसृष्टीतील ज्येष्ठ अभिनेते कमल हसन यांनी शुक्रवारी महाराष्ट्र नवनिर्माण सेनेचे (मनसे) अध्यक्ष राज ठाकरे यांची भेट घेतली. कमल हसन आज सकाळी राज यांच्या भेटीसाठी 'कृष्णकुंज' या त्यांच्या निवासस्थानी दाखल झाले. एरवीही कृष्णकुंजवर राज ठाकरेंच्या भेटीसाठी कला, उद्योग आणि इतर क्षेत्रातील मान्यवरांची वर्दळ असते. कमल हसन यांच्या कृष्णकुंज भेटीमागचे नेमके कारण अद्यापपर्यंत समजू शकले नसले तरी ही केवळ सदिच्छा भेट असल्याचे सांगण्यात येत आहे.
