मुंबई : माहीम येथील मुंबई महानगरपालिकेची न्यू माहीम शाळा इमारत धोकादायक असल्याचे कारण पुढे करून पालिका प्रशासनाने शाळा बंद केली असून लवकरच शाळेचे पाडकाम करण्यात येणार आहे. मात्र, शाळा संरचनात्मकदृष्ट्या मजबूत असल्याचा दावा पालक व सामाजिक कार्यकर्त्यांकडून करण्यात येत आहे. शाळा वाचवण्यासाठी विविध संस्था पुढे येऊ लागल्या आहेत. विविध प्रयत्न करूनही प्रशासनाकडून सकारात्मक प्रतिसाद मिळत नसल्याने येत्या १५ ऑगस्ट रोजी न्यू माहीम मनपा शाळेसमोर निषेध नोंदविण्यात येणार आहे.
न्यू माहीम शाळेचे सुमारे सात – आठ वर्षांपूर्वी नूतनीकरण करण्यात आले होते. त्यामुळे अल्पावधीतच शाळा धोकादायक असल्याचे घोषित केल्यामुळे पालक संतप्त झाले आहेत. तसेच, यासंदर्भात शाळेबाहेर कोणतीही नोटीस लावण्यात आलेली नाही. या शाळेत शिकणाऱ्या मराठी, हिंदी, कन्नड आदी माध्यमांतील शेकडो विद्यार्थ्यांचे दूरच्या अन्य शाळांमध्ये स्थलांतर करण्यात आले आहे. त्यामुळे विद्यार्थ्यांना प्रचंड पायपीट करावी लागत आहे. याच परिसरातील पालिकेच्या मोरी रोड माहीम शाळेची इमारत पुनर्बांधणीच्या नावाखाली तीन वर्षांपूर्वी पाडण्यात आली. मात्र, अद्याप तिचे बांधकाम झालेले नाही. त्यामुळे न्यू माहीम शाळाही कोणाच्या तरी आर्थिक हितासाठी पाडण्यात येत असल्याचा आरोप केला जात आहे.
शाळा इमारत पाडू नये याबाबत आम आदमी पक्षाच्या प्रणाली राऊत यांनी शेकडो पालकांच्या सह्यांचे निवेदन महापालिका आयुक्तांकडे दिले आहे. मात्र, पालिकेकडून अद्याप सकारात्मक प्रतिसाद मिळालेला नाही. त्यांनतर, शालेय शिक्षण अभ्यास व कृती समितीचे प्रमुख डॉ. दीपक पवार आणि अभिनेत्री व मराठी शाळांच्या सदिच्छादूत चिन्मयी सुमित यांनीही शाळेला भेट देऊन पाहणी केली. तसेच, शाळा न पाडण्याची मागणी केली. संबंधित प्रकरण चर्चेत आल्यांनतर शिवसेनेचे (ठाकरे) आमदार महेश सावंत यांनी देखील शाळेची पाहणी केली. तसेच, शाळा इमारत भक्कम दिसत असतानाही धोकादायक श्रेणीत टाकल्याबाबत त्यांनी आश्चर्य व्यक्त केले होते. तसेच, संबंधित शाळा पाडू नये, अशी मागणी पालिका आयुक्तांकडे केली होती.
त्यानंतरही महापालिका प्रशासनाकडून ठोस निर्णय घेण्यात येत नसल्याने, तसेच शाळेच्या पाडकामाविरोधात निषेध नोंदवण्यासाठी संबंधित परिसरात शनिवारी मेणबत्ती पदयात्रा काढण्याचे नियोजन मराठी अभ्यास केंद्र व अन्य सामाजिक कार्यकर्त्यांनी केले होते. मात्र, तांत्रिक अडचणींमुळे ते रद्द झाले. येत्या १५ ऑगस्ट रोजी पुन्हा शाळा पडण्याच्या निर्णयाचा निषेध करण्याचा निर्णय मराठी अभ्यास केंद्र आणि मराठी शाळा वाचवा समितीने घेतला आहे.
