लोकसत्ता खास प्रतिनिधी
मुंबई : नऊ वर्षांच्या मुलावर लैंगिक अत्याचार केल्याच्या आरोपाखाली दोन अल्पवयीन मुलांविरोधात गुन्हा दाखल करण्यात आला आहे. बालकांचे लैंगिक अत्याचारापासून संरक्षण कायद्या अंतर्गत गुन्हा दाखल करण्यात आला. त्यानंतर दोन्ही विधीसंगर्षग्रस्त मुलांची रवानगी डोंगरी बालसुधारगृहात करण्यात आली आहे. याप्रकरणी चुनाभट्टी पोलीस अधिक तपास करत आहेत.
दोन्ही विधिसंघर्षग्रस्त मुले १४ वर्षांची आहेत. त्यांनी पीडित मुलावर अत्याचार केला. याबाबतची माहिती पीडित मुलाकडून आईला समजली असता तिने पोलिसांकडे तक्रार केली. त्यानुसार पोलिसांनी बुधवारी रात्री भारतीय न्याय संहिता कलम १२७(२) व लैंगिक अत्याचारापासून संरक्षण ( पोक्सो )कायदा कलम ४,६, १० अंतर्गत गुन्हा दाखल केला. शीव येथील लोकमान्य टिळक रुग्णालयात पीडित मुलाची वैद्यकीय तपासणी करण्यात आली आहे.
याप्रकरणी दोन्ही मुलांविरोधात गुन्हा दाखल करण्यात आला असून त्यांची रवानगी डोंगरी येथील बालसुधारगृहात करण्यात आली आहे. विधीसंगर्षग्रस्त मुलाच्या घरात हा प्रकार घडला असून त्या ठिकाणी कोणतेही सीसीटीव्ही चित्रिकरण सापडलेले नाही. खेळण्याच्या बहाण्याने पीडित मुलाला दोन्ही अल्पवयीन मुलांनी घरी नेले होते, अशी माहिती सूत्रांनी दिली. पंचासह घटनास्थळी जाऊन पोलिसांनी पाहणी केली आहे. याप्रकरणी पोलीस अधिक तपास करत आहेत.
अल्पवयीन मुलांविरोधात घडलेल्या गुन्ह्यांमध्ये वाढ
मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्ये वाढ होत असल्याचे दिसते आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्या अंतर्गत १३४१ गुन्ह्यांची नोंद झाली होती. २०२३ पोक्सो कायद्या अंतर्गत ११०८ गुन्ह्यांची नोंद झाली होती. २०२४ मध्ये मुंबईत पोक्सो कायद्या अंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.
२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याच्या प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील अत्याचाराच्या घडनांमध्ये बहुसंख्य आरोपी परिचीत व्यक्त आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.
