मुंबई : ‘स्वस्त आणि सुरक्षित’ प्रवासाचा आनंद घेण्यासाठी शाळा – महाविद्यालयांना शालेय सहलीसाठी एसटी महामंडळ नवीन कोऱ्या बसगाड्या उपलब्ध करून देण्याचे नियोजन आहे.
स्वस्तात मस्त!
दरवर्षीप्रमाणे दिवाळी सुट्टी संपली की, शाळेच्या विद्यार्थ्यांना विविध प्रेक्षणीय स्थळांना भेट देण्यासाठी सहलीचे वेध लागतात. शालेय सहली हा विद्यार्थी जीवनातील अतिशय संस्मरणीय असा अनुभव असतो. राज्य शासन एसटीच्या माध्यमातून विद्यार्थ्यांना शालेय सहलीसाठी त्यांच्या एकूण भाड्यामध्ये ५० टक्के सवलत देते. त्यामुळे अतिशय मापक दरामध्ये विद्यार्थ्यांना राज्यातील विविध धार्मिक, ऐतिहासिक पर्यटन स्थळांना भेट देणे शक्य होते. तो त्यांच्या शालेय अभ्यासक्रमातील एक उपक्रम असतो.
अर्थात, यावेळी एसटी महामंडळाकडे असलेल्या नवीन बस या शालेय सहलीसाठी उपलब्ध करून दिल्या जातील. राज्यभरात एसटीच्या २५१ आगारांमधून दररोज ८०० ते एक हजार बस विविध शाळा- महाविद्यालयांना सहलीसाठी उपलब्ध करून दिल्या जातील, अशी माहिती परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली.
मागील वर्षी १९,६२४ बस
मागील वर्षी नोव्हेंबर ते फेब्रुवारी दरम्यान राज्यभरातील विविध शाळा- महाविद्यालयांना शालेय सहलीसाठी एसटी महामंडळाने तब्बल १९,६२४ बस उपलब्ध केल्या होत्या. या माध्यमातून एसटीला तब्बल ९२ कोटी रुपयांचा (प्रतिपुर्ती रक्कमेसह) महसूल मिळाला.
आगारप्रमुखांचा पुढाकार
यंदा प्रत्येक आगारातून त्यांच्या कार्यक्षेत्रातील शाळा- महाविद्यालयांना दररोज एसटी बस उपलब्ध करून देण्यात येईल. यासाठी आगारप्रमुख, स्थानकप्रमुख स्वतः शाळा – महाविद्यालयाच्या मुख्याध्यापक व प्राचार्याना भेटून विविध धार्मिक ऐतिहासिक पर्यटन स्थळांच्या सहलीचे आयोजन करण्यासाठी आवाहन करत आहेत, अशी माहिती एसटी महामंडळाद्वारे देण्यात आली.
