‘स्मार्ट सिटी’साठी मुंबईसह दहा शहरे

कोणताही राजकीय किंवा विभागीय वाद होऊ नये या उद्देशाने प्रत्येक विभागांतील शहरांची केंद्र सरकारच्या ‘स्मार्ट सिटी’ अभियानाकरिता राज्य मंत्रिमंडळाने निवड केली आहे. राज्याने शिफारस केलेल्या दहा शहरांमधून केंद्राकडून निवड केली जाईल व त्या शहरांच्या विकासासाठी निधी उपलब्ध होणार आहे.
सत्ताधारी पक्षातील नेतेमंडळी आपल्या शहराचा या योजनेत समावेश व्हावा म्हणून आग्रही होती. शहरांचा विकास करताना त्या महापालिकेची ५० कोटी रुपये स्वबळावर खर्च करण्याची ऐपत असली पाहिजे ही अट ठेवण्यात आली आहे. या निकषात कोणती शहरे बसतील याचा खल झाला. चंद्रपूर आणि कोल्हापूरचा समावेश व्हावा म्हणून आग्रह धरण्यात आला होता, कारण या योजनेत निवड झाल्यास केंद्र सरकारकडून शहरांच्या विकासाला निधी मिळणार आहे. सत्ताधारी खासदार आणि आमदारांना त्याचा राजकीय फायदा होऊ शकतो. राज्याकडून या दहा शहरांचा प्रस्ताव केंद्र सरकारला सादर केला जाईल. प्रत्येक शहराच्या संदर्भातील सविस्तर माहिती सादर करावी लागणार आहे. राज्याचा प्रस्ताव सादर झाल्यावर केंद्राचे पथक या शहरांची पाहणी करेल. ही सारी प्रक्रिया पुढील दोन महिन्यांमध्ये पूर्ण केली जाईल. त्यानंतर केंद्र सरकारकडून राज्यातील शहरांची यादी जाहीर केली जाईल. मुख्य सचिवांच्या अध्यक्षतेखाली उच्चाधिकार समिती नियुक्त करण्यात आली असून, ही समिती समन्वय साधण्याचे काम करणार आहे.