मुंबई : जे. जे. रुग्णालयातील डॉक्टरने अटल सेतूवरून उडी मारून आत्महत्या केल्याचे प्रकरण ताजे असताना आता याच रुग्णालयातील एका महिला डॉक्टरने गुरुवारी रात्री वसतिगृहातील खोलीमध्ये आत्महत्या करण्याचा प्रयत्न केला. डॉक्टरवर तातडीने उपचार करण्यात आले असून, सध्या तिची प्रकृती स्थिर आहे. रुग्णालय प्रशासन आणि वैद्यकीय शिक्षण व संशोधन विभागाने याप्रकरणाची चौकशी करण्यासाठी स्वतंत्र समिती स्थापन केली आहे.
जे. जे. रुग्णालयात कार्यरत असलेल्या महिला डॉक्टरने गुरुवारी रात्री वसतिगृहातील त्यांच्या खोलीमध्ये औषधांचे अतिरिक्त सेवन करून आत्महत्या करण्याचा प्रयत्न केला. मात्र त्यांच्या सहकाऱ्यांनी त्यांना तातडीने रुग्णालयात दाखल केले. वेळेवर उपचार झाल्याने त्यांचे प्राण वाचले असून, त्यांची प्रकृती स्थिर आहे. तसेच या घटनेची माहिती सदर डॉक्टरच्या उत्तर प्रदेशमधील आई, वडिलांना देण्यात आली. आत्महत्या करण्याचे नेमके कारण स्पष्ट झालेले नाही. मात्र या प्रकरणाची चौकशी करण्यासाठी रुग्णालय स्तरावर एक आणि वैद्यकीय शिक्षण व संशोधन विभागाने एक अशा दोन स्वतंत्र चौकशी समित्या स्थापन करण्यात आल्या आहेत. या समित्यांचा अहवाल सादर झाल्यानंतरच आत्महत्येचे नेमके कारण कळू शकेल, अशी माहिती जे.जे. रुग्णालयाचे अधिष्ठाता डॉ. अजय भंडारवार यांनी दिली.
