मुंबई विद्यापीठ अधिसभा निवडणूक : नवीन तारीख मतदारांपर्यंत पोहोचवण्यासाठी धावपळ, प्रचाराची रणधुमाळी शिगेला

नोंदणीकृत पदवीधर गटाची अधिसभा निवडणूक ही पसंतीक्रमाच्या मतांनुसार होते. या निवडणुकीत पहिल्या पसंतीक्रमाच्या मतांना अधिक महत्त्व असते. त्यामुळे पहिल्या पसंतीक्रमाची मते आपल्या पारड्यात पाडण्यासाठी विद्यार्थी संघटना सुरुवातीपासूनच मतांची जुळवाजुळव करण्यात गुंतलेल्या आहेत. ही निवडणूक जाहीर झाल्यापासून संघटनांकडून जोरदार प्रचार सुरू असून विविध माध्यमातून नोंदणीकृत पदवीधर मतदारांपर्यंत पोहोचण्याचा प्रयत्न केला जात आहे. निवडणुकीच्या प्रचारासाठी काही उमेदवारांनी मोठ्या प्रमाणावर खर्च केला आहे. त्यांना विजयाची आस लागली आहे. प्रत्यक्ष घरोघरी जाऊन मतदारांची भेट घेऊन निवडणूक व उमेदवारांसंदर्भात माहिती देण्यात आलेली आहे. तसेच निवडणुकीचा वचननामा, कार्य अहवाल आणि विविध ध्येय व उद्दिष्ट्यांचा उल्लेख असलेले निवेदन देऊन मतदान करण्याचे आवाहनही केले जात आहे. काही उमेदवारांनी चक्क स्पीड पोस्टद्वारे मतदारांच्या घरी निवेदन पोहोचवले आहे. मात्र या निवेदनावर निवडणुकीची जुनी तारीख नमूद असल्यामुळे हे उमेदवार आता व्हॉइस कॉल, एसएमएस आणि व्हॉट्सॲप मेसेजद्वारे मतदारांना नवीन तारखेची कल्पना देत आहेत. मतदान केंद्र आणि बूथमध्ये कोणताही बदल करण्यात आलेला नाही, असे मुंबई विद्यापीठ प्रशासनाने स्पष्ट केले.

हेही वाचा – मुंबई : अल्पवयीन मुलीवर अत्याचार करून अश्लील छायाचित्र मित्राला पाठवले, अल्पवयीन मुलासह दोघांविरोधात गुन्हा दाखल

दरम्यान, नोंदणीकृत पदवीधर गटाची अधिसभा निवडणूक ही २२ सप्टेंबर ऐवजी २४ सप्टेंबर रोजी आणि निकाल हा २५ सप्टेंबर ऐवजी २७ सप्टेंबर रोजी जाहीर करण्यात येणार असल्याचे मुंबई विद्यापीठ प्रशासनाने संकेतस्थळावर परिपत्रक प्रसिद्ध करून स्पष्ट केले. मात्र या बदलाबाबत काही मतदारांना कल्पना नसल्यामुळे ते रविवारीच मतदान केंद्रांवर जाऊन पोहोचले आणि त्यांचा गोंधळ उडाला. ‘मुंबई विद्यापीठाच्या अधिसभा निवडणुकीची तारीख बदललेली आहे, याबाबत कल्पना नव्हती. त्यामुळे मी ठरल्याप्रमाणे रविवारी सकाळी मालाडमधील एका महाविद्यालयात असणाऱ्या मतदान केंद्रावर जाऊन पोहोचलो. तिथे जाऊन कळले की रविवारी मतदान नाही. मुंबई विद्यापीठाने सर्व मतदारांना लवकरात लवकर ‘एसएमएस’ पाठवून कल्पना द्यावी’, असे एका मतदाराने सांगितले.

नोंदणीकृत पदवीधर गटाची अधिसभा निवडणूक व निकालाच्या नवीन तारखेसंदर्भातील परिपत्रक मुंबई विद्यापीठाच्या अधिकृत संकेतस्थळावर प्रसिद्ध करण्यात आले आहे. प्रसारमाध्यमे व इतर विविध माध्यमातून कळविण्यात आले आहे. तसेच नोंदणीकृत पदवीधर मतदारांना ‘एसएमएस’द्वारेही कळविण्यात येत आहे. – डॉ. प्रसाद कारंडे, कुलसचिव तथा निवडणूक निर्णय अधिकारी, मुंबई विद्यापीठ

हेही वाचा – लिपिक पदाच्या भरतीसाठी मुंबई महानगरपालिकेची पुन्हा जाहिरात, प्रचंड विरोधानंतर ‘ही’ अट वगळली

मतदारांना कार्यालयीन वेळेत दोन तासांची सवलत द्या किंवा सुट्टी जाहीर करा

नोंदणीकृत पदवीधर गटाची अधिसभा निवडणूक ही रविवार, २२ सप्टेंबर रोजी सुट्टीच्या दिवशी होणार होती. मात्र स्थगितीनंतर ही निवडणूक मंगळवार, २४ सप्टेंबर रोजी कार्यालयीन दिवसांमध्ये होत आहे. त्यामुळे सर्वांना मतदानाचा हक्क बजावता यावा आणि मतदान केंद्रावर पोहोचताना कोणतीही अडचण निर्माण होऊ नये, यासाठी मुंबई विद्यापीठाच्या नोंदणीकृत पदवीधर मतदारांना राज्य सरकारने कार्यालयीन वेळेत दोन तासांची सवलत द्यावी किंवा सुट्टी जाहीर करावी, अशी मागणी काही मतदार व उमेदवारांकडून करण्यात येत आहे.