काँग्रेसचा हात राणे सोडणार?

लोकसभा निवडणुकीत मुलाचा झालेला दारुण पराभव.. पक्षात कोणतीही महत्त्वाची जबाबदारी मिळण्याची शक्यता दूरान्वयानेही नाही.. देशभरात काँग्रेसचे झालेले पानिपत.. या सर्व पाश्र्वभूमीवर पक्षात प्रचंड अस्वस्थ असलेले नारायण राणे काँग्रेसचा हात सोडून जाण्याच्या तयारीत असल्याची जोरदार चर्चा आहे. काँग्रेसमधून हकालपट्टी घडवून आणल्यास भाजपशी हातमिळवणी करण्याचा पर्याय राणे यांच्यासमोर असू शकतो. लोकसभेतील विजयानंतर राज्यातील काही मंत्री, नेते आमच्या संपर्कात असल्याचे भाजपचे नेते गोपीनाथ मुंडे यांनी केलेले सूतोवाच या दृष्टीने महत्त्वाचे ठरते.
पक्षात अस्वस्थ असल्याने येत्या दोन-तीन दिवसांत महत्त्वाची बातमी देईन, असे राणे यांनी विधानभवनात पत्रकारांशी अनौपचारिकपणे गप्पा मारताना सांगितले. आणि राणे यांच्या अस्वस्थेविषयी चर्चा सुरू झाली. लोकसभेतील पराभवानंतर राज्यात नेतृत्व बदल केल्यास आपली वर्णी लागावी, असा राणे यांचा प्रयत्न होता. पण पृथ्वी ‘राज’ च कायम राहणार असल्याचे स्पष्ट होताच राणे यांची अस्वस्थता आणखीनच वाढली. त्यातच मंत्रिमंडळातून वगळण्याची मुख्यमंत्र्यांची योजना असल्याचे कळल्यावर राणे अधिकच संतप्त झाले होते. पक्षात आपल्या क्षमतेचा पुरेपूर वापर करून घेतला जात नाही, असे वक्तव्य राणे यांनी प्रचाराच्या काळात करून नेतृत्व बदल करायचे असल्यास विचार व्हावा, अशी भूमिका मांडली होती. काँग्रेसचे दिल्लीतील नेते राणे यांच्याकडे कोणतीही महत्त्वाची जबाबदारी सोपविण्यास राजी नाहीत. पक्षात अशीच कोंडी होणार असल्यास काँग्रेसमध्ये राहून काय साधणार, असा राणे यांना प्रश्न पडला आहे.