‘लोकसत्ता अभिजात लिटफेस्ट’मध्ये पु. ल. देशपांडे यांचे अपरिचित पैलू उलगडणार; ‘पुल’कित आठवणींना उजाळा देणारा खास कार्यक्रम

साहित्य, संगीत, नाट्य, चित्रपट, कला अशा विविध स्वरूपांतील मराठी संस्कृतीच्या ऐश्वर्याचा सांगोपाग वेध घेणारा सोहळा ‘लोकसत्ता अभिजात लिट फेस्ट’च्या माध्यमातून आयोजित करण्यात आला आहे. या ‘लोकसत्ता अभिजात लिट फेस्ट’ कार्यक्रमात काही खास, सुपरिचित नसलेले किंवा नव्यानेच सादर होणाऱ्या प्रयोगांचाही समावेश आहे. ‘अपरिचित पुलं’ हा अशाच प्रयोगांपैकी एक. पुलंच्या वाचकप्रिय साहित्याबरोबरच त्यांचे अनेकविध विषयांवरचे अप्रकाशित लेख आणि अन्य लेखन यांचा समावेश असलेला ‘अप्रकाशित पु.ल.’ हा संग्राह्य विशेषांक काही वर्षांपूर्वी ‘लोकसत्ता’च्या वतीने प्रकाशित करण्यात आला होता.

अशाच पद्धतीने लेखक, नाटककार, चित्रपट पटकथाकार, दिग्दर्शक, अभिनेते, संगीतकार, कथाकथनकार अशी बहुआयामी प्रतिभा असलेल्या पु. ल. देशपांडे यांचे अपरिचित साहित्य प्रेक्षकांसमोर आणण्याचा प्रयत्न ज्येष्ठ कलावंत चंद्रकांत काळे ‘अपरिचित पुलं’ या कार्यक्रमातून करत आहेत. पुलंच्या काही कविताही या कार्यक्रमातून गीत स्वरूपात सादर केल्या जातात. चंद्रकांत काळे यांच्या ‘शब्दवेध’ या संस्थेच्या वतीने सादर करण्यात येणाऱ्या ‘अपरिचित पुलं’ या कार्यक्रमात खुद्र चंद्रकांत काळे, अभिनेते गिरीश कुलकर्णी आणि ज्येष्ठ नाटककार सतीश आळेकर पुलंचे विविधांगी लेखन सादर करणार आहेत. त्यांना या कार्यक्रमात तबल्यावर अपूर्व द्रविड, तर हार्मोनियमवर दीप्ती कुलकर्णी यांची संगीतसाथ लाभणार आहे. हा पुलकित कार्यक्रम ‘लोकसत्ता अभिजात लिट फेस्ट’मध्ये कधी आणि कुठे पाहायला मिळणार याची माहिती लवकरच ‘लोकसत्ता’मध्ये वाचता येईल.