मुंबई : कूपर रुग्णालयात दोन महिलांना उंदरांचा चावा, रुग्णांच्या नातेवाईकांकडून संताप

मरोळ येथील शिवाजीनगर परिसरात राहत असलेल्या इंदुमती कदम (८५) यांना श्वास घेण्यास त्रास होत असल्याने त्यांना ३० ऑगस्ट रोजी सांयकाळी कूपर रुग्णालयामध्ये दाखल करण्यात आले. त्यांच्यावर अतिदक्षता विभागामध्ये उपचार करण्यात आले. त्यांच्या प्रकृतीमध्ये सुधारणा झाल्याने मंगळवारी त्यांना महिलांच्या सर्वसाधारण रुग्ण कक्षामध्ये हलविण्यात आले. महिलांच्या रुग्ण कक्षामध्ये फिरत असलेल्या उंदरांनी बुधवारी रात्री त्यांच्या उजव्या हाताला चार ठिकाणी कुरतडले. इंदुमती कदम यांची प्रकृती नाजूक असल्याने त्या सतत झोपेत असतात. त्यांना मधुमेहाचा त्रास असल्याने त्यांच्या संवेदना कमी झाल्या आहेत. त्यामुळे उंदराने कुरतडल्याचे त्यांच्या लक्षात आले नाही. इंदुमती यांचा नातू गुरुवारी सकाळी रुग्ण कक्षामध्ये त्यांना बघण्यासाठी आला होता. त्यावेळी ही घटना उघडकीस आली. उंदराने रुग्णाला कुरतडल्याचे परिचारिकांच्या निदर्शनास आणून दिले. मात्र सुरुवातील कोणीही उपचार करण्यास तयार नसल्याने आरडाओरडा केल्यावर डॉक्टरांना बोलाविण्यात आले. डॉक्टर आल्यावर त्यांनी तातडीने उपचार केल्याचे इंदुमती यांचे जावई संतोष जाधव यांनी सांगितले.

रुग्णालय प्रशासनाकडे तक्रार

इंदुमती कदम यांना मधुमेहाचा त्रास असून, उंदरांनी त्यांच्या हाडापर्यंत मास कुरतडून खाल्ले आहे. उंदराने कुरतडलेली जखम लवकर बरी झाली नाही, तर त्याचा त्रास इंदुमती यांना सहन करावा लागणार आहे. यासंदर्भात आम्ही रुग्णालय प्रशासनाकडे तक्रार केली आहे, पण यापुढे अन्य कोणत्याही रुग्णाला असा त्रास होऊ नये यासाठी रुग्णालय प्रशासनाने काळजी घ्यावी, अशी अपेक्षाही इंदुमती यांच्या नातेवाईकांनी व्यक्त केली.

उंदरांचा वावर वाढल्याचे लक्षात आल्यानंतर तातडीने महापालिकेच्या उपायुक्तांनी कूपर रुग्णालयाला गुरुवारी भेट दिली. यावेळी त्यांनी के विभाग कार्यालयातील कीटकनाशक विभागातील अधिकाऱ्यांना सात दिवस तेथे उपस्थित राहण्याचे आदेश दिले. त्यांनी उंदीर नियंत्रण उपाययोजना करून रुग्णालयातील सर्व कचऱ्याची विल्हेवाट लावली आहे. रुग्णालयामध्ये उंदरांना आळा घालण्यासाठी कंत्राट दिलेल्या कंत्राटदाराला कारणे दाखवा नोटीस बजावण्यात येणार आहे. – डॉ. देव शेट्टी, वैद्यकीय अधीक्षक, कूपर रुग्णालय