किशोरी पेडणेकर यांच्या अडचणीत वाढ; बनावट कागदपत्रांप्रकरणी पुत्राच्या कंपनीला न्यायालयाचे समन्स

या प्रकरणी कंपनी कायद्यांतर्गत तक्रार नोंदवण्यात आली आहे. किश कॉर्पोरेट सव्‍‌र्हिसेस प्रायव्हेट लिमिटेडसह त्याचे अतिरिक्त संचालक साईप्रसाद पेडणेकर, संचालक शैला गवस, प्रशांत गवस आणि अतिरिक्त संचालक गिरीश रेवणकर यांना समन्स बजावण्यात आले आहे. या प्रकरणी कंपनी उपनिबंधकांनी तक्रार केली आहे. त्यानुसार, किश कॉर्पोरेट सव्‍‌र्हिसेस आणि अन्य आरोपींनी कंपनीच्या नोंदणीसाठी बनावट कागदपत्रांचा वापर केला, त्यानंतर मालकाच्या खोटय़ा स्वाक्षऱ्या करून नोंदणीकृत कार्यालयही बदलल्याची तक्रार आली. फेब्रुवारी २०२२ मध्ये आरोपींकडून याबाबत स्पष्टीकरण मागण्यात आले. मार्च २०२२ मध्ये कॉर्पोरेट व्यवहार मंत्रालयाने कंपनी कायद्यांतर्गत कंपनी आणि संचालकांवर खटला चालवण्यास मंजुरी दिली.