लाडक्या बहिणींमुळे एसटीचे उत्पन्न वाढले, एसटीला एकाच दिवशी ३९ कोटींचे उत्पन्न

दरवर्षी एसटीला रक्षाबंधन आणि भाऊबीज (दिवाळी) या दोन दिवसात विक्रमी उत्पन्न मिळते. कारण, या दिवशी भाऊ बहिणीकडे किंवा बहिण भावाकडे जातात. परिणामी, गेल्या कित्येक वर्षे रक्षाबंधनाच्या सणाच्या कालावधीत एसटीला त्या वर्षातील विक्रमी उत्पन्न मिळत आले आहे. यंदा रक्षाबंधन आणि त्याच्या दुसऱ्या दिवशी एसटीला प्रवाशांची प्रचंड गर्दी झाली. रक्षाबंधनाच्या आदल्या दिवशी म्हणजे शुक्रवारी ३०.०६ कोटी रुपये, रक्षाबंधन दिवशी म्हणजे शनिवारी ३४.८६ कोटी व दुसऱ्या दिवशी म्हणजे रविवारी ३३.३६ कोटी रुपये, तर सोमवारी तब्बल ३९.९ कोटी इतके विक्रमी उत्पन्न एसटीला मिळाले. रक्षाबंधनाच्या निमित्ताने ८ ते ११ ऑगस्ट या ४ दिवसांच्या कालावधीत १ कोटी ९३ लाख प्रवाशांनी एसटीमधून प्रवास केला. त्यामध्ये महिला प्रवाशांची संख्या तब्बल ८८ लाख आहे.

कर्मचाऱ्यांचे कौतुक

रक्षाबंधनानिमित्त एवढ्या मोठ्या प्रमाणात प्रवाशांनी दिलेल्या प्रतिसादाबद्दल प्रताप सरनाईक यांनी आभार मानले आहेत. तसेच आपल्या घरी सण असून देखील कर्तव्याला प्राधान्य देत अत्यंत मेहनतीने काम करून विक्रमी उत्पन्न मिळवणाऱ्या एसटी कर्मचाऱ्यांचे त्यांनी कौतुक केले.

गेल्यावर्षी किती महसूल

रक्षाबंधन आणि त्याला जोडून आलेल्या सुट्ट्यांमुळे १७ ते २० ऑगस्ट २०२४ या चार दिवसांमध्ये एसटी भरगच्च भरल्या होत्या. यातून एसटी महामंडळाला १२१ कोटी रुपयांची उत्पन्न मिळाले. २० ऑगस्टला एकाच दिवशी तब्बल ३५ कोटी रुपये उत्पन्न महामंडळाला प्रवासी वाहतुकीतून मिळाले. हा महसूल २०२४-२५ या आर्थिक वर्षातील विक्रमी महसूल होता.

एसटी महामंडळाची १२ कोटींची बचत

इंडियन ऑइल आणि भारत पेट्रोलियम या कंपन्यांनी एसटी महामंडळाला पुरवण्यात येणाऱ्या डिझेल इंधनावरील देण्यात येणाऱ्या सवलत दरात प्रति लिटर ३० पैशाची वाढ करण्याचा निर्णय घेतला आहे. त्यामुळे दिवसाला सरासरी ३ लाख २३ हजार रुपये याप्रमाणे वर्षाला अंदाजे ११ कोटी ८० लाख रुपयांची बचत होईल. एसटी महामंडळाला सध्या दररोज सरासरी १० कोटी ७८ लाख लिटर डिझेल लागते.