मुंबईत करोनाची साथ वाढल्याने व विषाणूने राजभवनात शिरकाव केल्याने राज्यपाल भगतसिंह कोशियारी नागपूरला काही दिवसांच्या मुक्कामासाठी येत असल्याची माहिती आहे. बुधवारी २२ जुलैला दुपारी १२ वाजता त्यांचे आगमन होत आहे. विशेष म्हणजे, दौऱ्यात त्यांच्या परतीच्या प्रवासाचा उल्लेख नाही. तसेच सार्वजनिक कार्यक्रम किंवा बैठकीला ते उपस्थित राहणार असल्याचेही नमूद नाही. जुलैच्या दुसऱ्या आठवडय़ात करोना राजभवनापर्यंत पोहोचला. तेथील १६ कर्मचारी बाधित झाले. त्या तुलनेत नागपूर सुरक्षित आहे. त्यामुळे राज्यपाल काही दिवस नागपूरला राजभवनात मुक्कामी राहण्याची शक्यता आहे. यासंदर्भात राजभवनातील अधिकारी रमेश येवले यांच्याशी संपर्क साधला असता ते म्हणाले, ‘हे राज्यपालांचे निवासस्थान आहे. ते येथे कधीही येऊन राहू शकतात.’’
