बुलढाणा : विदर्भ पंढरी शेगाव येथे संत गजानन महाराजांच्या ११५ व्या पुण्यतिथी उत्सव सोहळ्यास आज (२४ ऑगस्ट) पासून प्रारंभ झाला आहे. यनिमित्त येत्या २९ ऑगस्ट पर्यंत पाच दिवस दररोज ‘श्रीं’च्या मंदिरात विविध धार्मिक कार्यक्रमांचे आयोजन करण्यात आले आहे. २८ ऑगस्ट रोजी हजारो भाविक भक्तांच्या उपस्थितीत ‘श्रीं’चा पुण्यतिथी उत्सव मोठ्या उत्साहात आणि पारंपरिक पद्धतीने साजरा होणार आहे.
मंदिरात आजपासून विविध धार्मिक कार्यक्रमांचे आयोजन करण्यात आले आहे. दररोज सकाळी ६ ते ६.४५ काकडा, सकाळी ७.१५ ते९.१५ भजन, दुपारी ४ ते ५ प्रवचन, सायंकाळी ५.३० ते ६ हरिपाठ रात्री ८ ते १० हरी किर्तन आयोजित करण्यात आले आहे. उद्या २५ ऑगस्ट रोजी ह.भ.प. भरत बुवा जोगी रा.परळी, २६ ऑगस्ट रोजी ह.भ.प. प्रशांत बुवा ताकोते रा. शिरसोली, २७ ऑगस्ट रोजी ह. भ. प. भरत बुवा पाटील रा. म्हैसवाडी, २८ ऑगस्ट रोजी ह भ प बाळू बुवा गिरगावकर रा.गिरगाव यांचे कीर्तन होईल.
समाधी सोहळ्यानिमित्त कीर्तन
२८ ऑगस्ट वार गुरुवार रोजी ह.भ.प. भरत बुवा पाटील म्हैसवाडीकर यांचे सकाळी ७ ते ९ श्रींचे समाधी सोहळ्या निमित्त कीर्तन होणार आहे. यज्ञ् अन परिक्रमा या उत्सवानिमित्त श्री गणेशयागास व वरूणयागास आज २४ ऑगस्ट रोजी आरंभ झाला आहे २८ ऑगस्ट रोजी सकाळी १० वाजता यज्ञाची पुर्णाहूती व अवभृतस्नान होईल. दुपारी उत्सवाची पालखीचे श्रींच्या रजत मुखवट्याचे पुजन होवून श्रींच्या पालखीचे रथ, मेणा, पताका टाळकरी, अश्‍वासह परिक्रमा निघेल. सायंकाळी मंदिरात श्रींची महाआरती व टाळकरी यांचा आकर्षक रिंगण सोहळा व श्रींची आरती होणार आहे. २९ ऑगस्ट रोजी ह.भ.प.प्रमोद बुवा राहणे पळशी यांचे सकाळी ६ ते ७ काल्याचे कीर्तन होईल व नंतर दहीहंडी गोपाळकाला यांच्या कार्यक्रम होणार आहे.
विविध सुविधा
श्रींचे पुण्यतिथी उत्सवानिमित्त श्रींच्या मंदिरावर व परिसरात रंगबेरगी आकर्षक विद्युत रोषणाई करण्यात आली आहे.सर्वत्र मंदिर परिसरात केळीचे खांब व आंब्याच्या पानांचे तोरण लावण्यात येवून भक्तीमय वातावरण असून श्रींच्या नामघोषात भक्त तल्लीन होत आहे. महाराष्ट्रातील मराठवाडा, खानदेश, विदर्भसह मध्ये प्रदेशातील भजनी दिंड्यांचा ज्ञानोबा तुकाराम यांच्या नामघोष करीत संत नगरीत श्रींच्या पुण्यतिथी उत्सवात सहभागी होत आहेत.
भक्तांच्या सोयीसाठी श्रींचे दर्शनसाठी एकेरी मार्ग करण्यात आला आहे. त्यात दर्शनबारी व श्रीमुख दर्शनबारी, महाप्रसाद, पारायण मंडप, श्रीचे दर्शनाची व्यवस्था केली आहे. तसेच भक्तांच्या सोयीसाठी संस्थानच्या भक्त निवासामध्ये नियमानुसार राहण्याची व्यवस्था नित्याप्रमाणे सुरू आहे. संपूर्ण मंदिर परिसरात स्वच्छता ही भक्तांना श्रींच्या प्रति आपली आस्था प्रसन्न मनाने एकरूप करणारी आहे.भक्तांना कोणताही त्रास होवू नये यास्तव श्रींचे सेवेकरी आपली सेवा देण्यास तत्पर आहेत. या उत्सव काळात सर्वतोपरी सोयीसुविधा संस्थानच्या वतीने पुरविल्या जात आहेत.
