नागपूर: मुख्यमंत्री देवेंद्र फडणवीस यांच्या पुढाकाराने नागपुरातील मेडिकल रुग्णालयात सिकलसेल वेलनेस हब उभारला जाणार आहे. त्यासाठी नोर्डिस्क एज्युकेश फाऊंडेशन (एनएनईएफ) यांनी मेडिकल प्रशासनासोबत सामंजस्य करार केला आहे. या प्रकल्पामुळे रुग्णांना अद्यावत उपचारासह आजारावर अभ्यास व संशोधनात्मक कामे होणार आहे.
मेडिकलमध्ये प्रस्तावित केंद्रात सिकलसेल आजाराचे निदान, उपचार, नियमित निगा, आहारविषयक मार्गदर्शन, समुपदेशन, तसेच रुग्ण व त्यांच्या कुटुंबीयांसाठी शिक्षण शिबिरे यांचा समावेश असणार आहे. सिकलसेलग्रस्तांना येथे केवळ उपचारच नव्हे तर जगण्याची गुणवत्ता सुधारण्यासाठी आवश्यक असलेली सर्वसमावेशक सेवा देणे या हबचा उद्देश आहे. सिकलसेलग्रस्तांची शासकीय यंत्रणेत नोंदणी करून त्यांच्यासाठी प्रमाणित आणि दर्जेदार आरोग्य सेवा निर्माण करणे. मेडिकलमधील सुविधा बळकट करणे आणि बालमैत्रीय व रोगनिवारण केंद्र उभारणे. विविध माध्यमांतून जनजागृती वाढवणे. राज्यस्तरीय सिकल सेल व्यवस्थापन मार्गदर्शक तत्वे तयार करण्यात सहकार्य करणे. आरोग्य कर्मचाऱ्यांचे प्रशिक्षण व क्षमतावृद्धीसाठी उपक्रम राबवणे. ठोस आकडेवारी संकलन करून धोरणात्मक शिफारसी सादर करणे, ही या प्रकल्पाची प्रमुख उद्दीष्ट आहे.
एनएनईएफ संस्था काय करणार?
एनएनईएफ ना नफा- ना तोटा तत्वावर प्रकल्प राबविणार आहे. त्यानुसार रुग्ण व त्यांच्या कुटुंबीयांसाठी शैक्षणिक व समुपदेशन शिबिरे घेणे, रुग्णांसाठी साहित्य तयार करून राज्यभर वितरण, रुग्णांच्या नोंदणीसाठी विशेष संगणक प्रणालीची निर्मिती, तज्ज्ञांच्या मदतीने उपचाराची दिशा ठरवणे, बालरुग्णांसाठी अनुकूल केंद्राची संरचना, रुग्णांसाठी विशेष समुपदेशकांची नियुक्ती, रुग्णांचा डेटा तयार करून धोरणनिर्मितीसाठी मदत, राज्य शासनासह राष्ट्रीय आरोग्य अभियान आणि केंद्रीय आरोग्य मंत्रालयासोबत धोरणात्मक कार्यशाळा व सल्ला सत्रही एनएनईएफतर्फे आयोजित केले जाणार आहे.
रुग्णांसाठी काय लाभ?
वेलनेस हबमुळे मेडिकलमध्ये सिकलसेलग्रस्त मुलांसाठी खास डिझाइन असलेले वॉल ग्राफिक्स आणि फ्लोअर मॅटिंग बसवणे, रुग्णांसाठी वजन मापण्यासाठी मशीन, उंची मोजण्यासाठी स्टॅडिओमीटर, ब्लड प्रेशर मोजण्याचे यंत्र, इलेक्ट्रोफोरेसिस मशीन – सिकल सेल निदानासाठी, वातानुकुलित यंत्रणा, रुग्ण व पालकांसाठी शैक्षणीक साहित्य, मुलांसाठी खेळणी व शैक्षणिक साधने तसेच टेलिकॉन्सल्टेशनची सुविधा विकसित केली जाणार आहे. त्याशिवाय सिकलसेल तपासणीसाठी शिबिरे, सुमारे १ हजार तपासणी किट्स वापरून ग्रामीण व आदिवासी भागात तपासणी, रुग्ण शिक्षक नियुक्त करणे, रुग्णांसाठी समुपदेशन व शिक्षण देण्यासाठी शैक्षणीक साधने उपलब्ध केली जाणार आहे.
