सावरकरांच्या अखंड भारताच्या स्वप्नाचे काय?

नागपूर : नागरिकत्व कायद्यावर शिवसेनेची भूमिका काय, याबाबत संभ्रम नको. आमचे धोरण स्पष्ट आहे. सावरकरांच्या अखंड भारताच्या स्वप्नाचे काय झाले, यावर भाजप का बोलत नाही, आमच्या प्रश्नाला उत्तर का देत नाही, असा सवाल मुख्यमंत्री उद्धव ठाकरे यांनी केला.

शिवसेनेच्या वतीने मुख्यमंत्री उद्धव ठाकरे यांचा आज सोमवारी जाहीर सत्कार करण्यात आला. यावेळी ते बोलत होते. रेशीमबागेतील सुरेश भट सभागृहात झालेल्या या कार्यक्रमाला पक्षाचे ज्येष्ठ नेते सुभाष देसाई, आमदार आदित्य ठाकरे, दिवाकर रावते, नीलम गोऱ्हे, खासदार प्रतापराव जाधव,  खासदार भावना गवळी, खासदार कृपाल तुमाने यांच्यासह विदर्भातील आमदार, खासदार व पदाधिकारी उपस्थित होते. यावेळी मुख्यमंत्री म्हणाले,  शिवसेनेने दिलेली वचने आजपर्यंत पाळली आहेत आणि यापुढे ती पाळली जाणार आहेत. त्यासाठीच शिवसेना सत्तेत आली आहे. मात्र केंद्र सरकारने नोटाबंदी आणल्यानंतर ५० दिवस द्या असे जनतेला जाहीरपणे आव्हान केले होते. त्याचे पुढे काय झाले हे सवश्रूत आहे. राज्यात सत्ता आल्यानंतर शिवसैनिकांमध्ये उत्साहाचे वातावरण आहे. हा उत्साह यापुढे टिकवायचा आहे.  मुख्यमंत्री पद मोठे आहे पण आव्हानेही तेवढीच मोठी आहेत. आपण छोटी आव्हाने स्वीकारत नाही. हे आव्हान मोठे आहे मात्र ते स्वीकारले नसते तर शिवसेना प्रमुखाचा पुत्र म्हणून ते योग्य झाले नसते. आज तीन पक्षाचे मिळून महाविकास आघाडी स्थापन करण्यात आली असली तरी सगळ्यांना सोबत घेऊन राज्याचा विकास करणार आहे. दिलेल्या वचनाचे पालन करणे हा आपला धर्म आहे. मात्र पूर्वी आपला मित्र पक्ष दिलेले वचन विसरून आम्हाला खोटे पाडत होता, अशा शब्दात ठाकरे यांनी फडणवीस यांच्यावर टीका केली. आम्ही हिंदुत्व वादी आधी होतो आणि उद्याही राहणार आहोत. सरकारमध्ये येताच आम्ही धर्म परिवर्तन केले नाही. सत्तेत आलो ते जनतेसाठी. जनतेला आपले सरकार वाटले पाहिजे, असे वागा. राज्यात सत्ता आली असली तरी कार्यकर्त्यांनी ऊतू, मातू नयेआणि देशसेवेचा वसा टाकू नये, असे आवाहन त्यांनी केले.