नागपूर : मुख्यमंत्री व ऊर्जामंत्री देवेंद्र फडणवीस यांचे गृह शहर असलेल्या नागपुरात वादळी वाऱ्यासह पावसाच्या तडाख्यात बुधवारी अनेक वीज यंत्रणेवर वृक्ष वा फांद्या कोलमडून पडल्या. त्यामुळे अनेक भागातील वीज तासंतास खंडित झाली. वीज कर्मचाऱ्यांनी रात्रीच्या अंधारात काम करून अनेक भागातील वीज पुरवठा सुरळीत केला.
वादळी वाऱ्यासह पावसाने झोडपल्याने महावितरणच्या अजनी शाखा कार्यालयाच्या हद्दीतील ११ केव्ही सावरकर नगर, हिंदुस्तान कॉलनी आणि गावंडे लेआउट येथील वीज वाहिन्यांवर झाडांच्या फांद्या कोसळल्या. परिणामी, या भागातील वीजपुरवठा खंडित झाला. याशिवाय, वेदांत पर्ल, वेदांत डायमंड आणि हिमवर्षा अपार्टमेंटसह अनेक वितरण रोहित्रेही बंद पडली.
या आपत्कालीन परिस्थितीत महावितरणने तातडीने युद्धपातळीवर दुरूस्तीचे काम हाती घेतले. सुरुवातीला ११ केव्ही गावंडे लेआउट वाहिनीचा वीजपुरवठा सुरू केला गेला. त्यानंतर, रात्री ९.३० वाजता झाडांच्या फांद्या बाजूला करून ११ केव्ही सावरकर नगर वाहिनी सुरू केली गेली. ११ केव्ही हिंदुस्तान कॉलनी वाहिनीवर हॉटेल रोसेटा क्लबजवळ वितरण पेटीची आउटडोअर जॉइंट इनकमर केबल खराब झाली होती. तसेच इतरही बिघाड झाले होते. हा बिघाड मध्यरात्री १२.१५ दरम्यान दुरूस्त केला गेला.
जाटतारोडी उपकेंद्रातील बिघाड दूर
३३ केव्ही जाटतरोडी उपकेंद्रातील १० एमव्हीए रोहित्रात बुधवारी रात्री ७.५३ वाजता बिघाड झाला. त्यामुळे त्या रोहित्रावरून वीजपुरवठा करणाऱ्या सर्व वाहिन्या बंद पडल्या होत्या. वीज कर्मचाऱ्यांनी तात्काळ कार्यवाही करत उंटखाना वाहिनीला एसटी स्टँड उपकेंद्रावरील ११ केव्ही ग्रेट नाग रोड वाहिनीवरून रात्री ८.४० वाजता वीजपुरवठा सुरू केला.
११ केव्ही राजाबक्षा वीज वाहिनीवर झाड पडल्याने वीजपुरवठा बंद झाला होता. तो रात्री ९.१० वाजता अंशतः आणि ११.३० वाजता पूर्ण सुरळीत केला गेला. ११ केव्ही पटेल चौक वाहिनीला ११ केव्ही एसटी स्टँड उपकेंद्रावरील ११ केव्ही घाट रोड वाहिनीवरून रात्री ११.१५ वाजता सुरू केले गेले. मेडिकल चौक वीज वाहिनीवरील वीजपुरवठा रात्री ९.१५ वाजता सुरू झाला. जाटतारोडी उपकेंद्रातील बंद १० एमव्हीए रोहित्र मध्यरात्री १.४४ वाजता सुरू झाल्याचा महावितरणचा दावा आहे.
ताजबाग रघुजी नगर, हनुमान नगर चंदन नगर अंतुगीनगर, तुलसीनगर स्वामीनारायण, वाडी, हिंगणा, खडगाव, गोरेवाडा, अजनी, गिट्टीखदान, पोलिस लाईन, गायत्री नगर, झिंगाबाई टाकळी, ओम नगर, झिंगावाई टाकळी, किंग्सवे, क्लर्क टाऊन, दिनशॉ, गोरेवाडा, मेंटल हॉस्पिटल, खामला, सावरकर नगर, दीनदयालनगर, पेंशननगर, धरमपेठ, हिलटॉप, जयप्रकाशनगर, बुटीबोरी आदी भागातील वीज वाहिन्यांवर झाडाच्या फांद्या तुटून पडल्याने तारा तुटून वीज पुरवठा खंडित झाला होता.
महावितरणकडून दिलगिरी… वादळी पावसामुळे निर्माण झालेल्या या आव्हानात्मक परिस्थितीत अजनी शाखा कार्यालयांतर्गत अनेक ठिकाणी झाडांच्या फांद्या कोसळल्याने वीज वितरण यंत्रणा विस्कळीत झाल्याने वीजपुरवठा पूर्ववत करण्यासाठी वेळ लागला. ग्राहकांना झालेल्या त्रासाबद्दल महावितरणने दिलगिरी व्यक्त केली असून. आमच्या कर्मचाऱ्यांनी या कठीण काळात अहोरात्र काम करून वीजपुरवठा लवकरात लवकर पूर्ववत करण्यासाठी सर्वतोपरी प्रयत्न केल्याची माहिती महावितरणने दिली आहे.
