लोकसत्ता टीम
बुलढाणा: जिल्ह्यात जेमतेम ५१ पोलीस जागांसाठी आज रविवारी तब्बल ५७० परिक्षार्थींनी लेखी परीक्षा दिली. बुलढाण्यातील शारदा व एडेड माध्यमिक शाळेत असलेल्या केंद्रात आज सकाळी ११ ते दुपारी १२.३० वाजेदरम्यान कडक पोलीस बंदोबस्तात लेखी परीक्षा पार पडली.
५१ पदांसाठी तब्बल ४४४८ युवकांनी अर्ज केले होते. छाननीत शेकडो युवक गळाले. ३ ते १० जानेवारी दरम्यान मैदानी चाचण्या पार पडल्या होत्या. अडीच हजार उमेदवारांनी यात जोर लावला. अंतिम परीक्षेसाठी ५७० उमेदवारांना संधी मिळाली. आता यातील ५१ भाग्यवान कोण ठरतात आणि कोणाचे पोलीस होण्याचे स्वप्न पूर्ण होते याचा निकाल लवकरच लागणार आहे. या निकालाची ५७० उमेदवार व त्यांच्या परिवाराला प्रतीक्षा लागून आहे.
