जहाल माओवादी देवसूचे आत्मसमर्पण, मिलिंद तेलतुंबडेचा होता अंगरक्षक

जिल्हाधिकारी प्रजित नायर, पोलीस अधीक्षक गोरख भामरे यांचे समक्ष ३.५० लाखाचे जाहीर बक्षीस असलेला जहाल माओवादी देवसू उर्फ देसु, मूळ नाव – देवा राजा सोडी, (२४) रा. चीटिंगपारा/ गुंडम, पो. पामेड, पो.स्टे. तर्रेम, ता.उसूर, जि.- बिजापूर (छ. ग.) पद – सदस्य, प्लाटून मेंबर (CC मेंबर दिपक उर्फ मिलिंद तेलतुंबडे (मृत) याचा अंगरक्षक ) याने आत्मसमर्पण केले. देशातील माओवादी चळवळीला प्रतिबंध व्हावा व अधिकाधिक माओवाद्यांनी आत्मसमर्पण करून त्यांना विकासाच्या मुख्य प्रवाहात आणण्याकरिता तसेच त्यांचे सामाजिक व आर्थिक पुनर्वसन व्हावे या उद्देशाने महाराष्ट्र शासनामार्फत “नक्षल आत्मसमर्पण योजना” राबविली जात आहे.

तसेच जे माओवादी विविध भूलथापा आणि प्रलोभनांना बळी पडून माओवादी संघटनेत भरती झाले आहेत त्यांना हिंसेचा मार्ग सोडून समाजाच्या मुख्य प्रवाहात समाविष्ट होण्याबाबत आवाहन करण्यात येत आहे.गोंदिया जिल्हा पोलीसांनी आत्मसमर्पणकरिता केलेले आवाहन, माओवादी संघटनेतील वरिष्ठ नेत्यांच्या पिळवणूक आणि अत्याचारास कंटाळून, तसेच माओवादी संघटनेतील अतिशय कठीण वेदनामयी जीवनाला कंटाळून ३.५ लाखाचे बक्षीस असलेला जहाल माओवादी देवसू उर्फ देसु याने आत्मसमर्पणाचा मार्ग स्वीकारला.

देवसू हा नक्षलदृष्ट्या अतिसंवेदनशील गावातील रहिवासी असून त्याचे गावात नक्षल्यांचे नेहमी येणे जाणे होते. नक्षलवादी जल, जंगल, आणि जमिनीच्या लढाई खाली भोळ्या भाबड्या आदिवासी नागरिकांना सरकार विरुद्ध भडकावून, तथाकथित व खोट्या क्रांती चे कथन करून लोकांना नक्षल चळवळीत ओढण्याचा प्रयत्न करायचे.त्यामुळे लहान पणापासून तो नक्षलयांच्या विविध प्रलोभन व भूलथापांना बळी पडून नक्षल विचारसरणीशी प्रभावित होऊन बाल संघटन मध्ये रुजू झाला होता.डिसेंबर २०१७ मध्ये त्याला इतर काही नवीन भरती झालेल्या माओवाद्यांसह एम. एम. सी. झोन मध्ये पाठविण्यात आले. नक्षल दलम सोबत १५ दिवस काम केल्यानंतर त्यास तत्कालीन एम. एम.सी. झोन प्रभारी मिलिंद उर्फ दीपक तेलतुंबडे याचा अंगरक्षक म्हणून नेमण्यात आले होते. १३ नोव्हेंबर २०१२ रोजी मर्दिनटोला, जि. गडचिरोली येथे नक्षलवादी आणि पोलीस यांच्यात झालेल्या चकमकीत मिलिंद तेलतुंबडे याचेसह एकूण २८ नक्षलवादी मारले गेलेत. सदर चकमकीतून माओवादी देवसु व त्याचे काही साथीदार जीव वाचवून पळून गेले.

सदर माओवादी देवसू उर्फ देसू उर्फ देवा याने वर्ष २०१७ ते २०२२ मध्ये माओवादी संघटनेत कार्यरत असताना गोंदिया जिल्ह्यासह इतर जिल्ह्यात घडलेल्या विविध गुन्ह्यात सहभागी असल्याचे कबूल केले आहे.तो राजनांदगाव, सध्या खैरागड / छत्तीसगड) अंतर्गत तांडा जंगल परिसरात झालेल्या पोलीस माओवादी चकमकीत, कान्हा भोरमदेव एरिया जंगल परिसरात झालेल्या पोलीस माओवादी चकमकीत आणि मर्दीनटोला ( गडचिरोली)जंगल परिसरात झालेल्या पोलीस माओवादी चकमकीत सहभागी होता.

देवसु याचे आत्मसमर्पीत होण्याची महत्वाची कारणे देत सांगितले की १३नोव्हेंबर २०२१ रोजी मर्दिनटोला येथे झालेल्या चकमकीत दीपक तेलतुंबडे याला माझ्यासमोर गोळी लागली व तो मरण पावला. त्यावेळी काही जण तिथून जीव वाचवून पळून गेले. तेव्हापासून मला मृत्यूची व अटकेची सारखी भीती वाटत होती असे देवसु म्हणाला.

पोलीस दलाच्या सततच्या नक्षल विरोधी अभियानामुळे जंगलातील वावर धोकादायक झाला आहे. पोलिसांची सारखी भीती वाटते.
वरिष्ठ कॅडर हे पोलीस खबरी असल्याच्या संशयावरुन निरपराध आदिवासी बांधव, सामान्य नागरिकांना ठार मारायला सांगतात. हे कदापी संयुक्तिक वाटत नाही. त्यामुळे मी महाराष्ट्र शासनाच्या आत्मसमर्पण योजनेने प्रभावित होऊन समर्पण करण्याचा निर्णय घेतला, असेही त्याने सांगितले.हे आत्मसमर्पण पोलीस अधीक्षक गोंदिया गोरख भामरे, आणि अपर पोलीस अधीक्षक नित्यानंद झा, यांच्या मार्गदर्शनाखाली यशस्वीरित्या पार पडले.