जात प्रमाणपत्र, नॉन क्रिमिलेअर, जातवैधता कसे काढतात? कोणती कागदपत्रे आवश्यक? सविस्तर वाचा…

ओबीसी व एसबीसी प्रवर्गातील व्यक्तींना जात वैधता प्रमाणपत्र मिळवण्यासाठी १९६७ पूर्वीचे पुरावे सादर करावे लागतात. ‘एनटी’ प्रवर्गासाठी १९६१पूर्वीचे पुरावे आवश्यक असतात तर एससी आणि एसटी प्रवर्गासाठी १९५९ पूर्वीचे पुरावे अर्जासोबत जोडावे लागतात. बार्टीच्या वेबसाईटवर जात वैधता प्रमाणपत्र मिळवण्यासाठी अर्ज करता येतो. याच वेबसाईटवर अर्जदार कोणत्या कारणांसाठी जात वैधता प्रमाणपत्राची मागणी करत आहे त्यानुसार लागणाऱ्या कागदपत्रांची यादी देण्यात आली आहे.

ऑनलाइन अर्ज केल्यानंतर अचूक कागदपत्रे असल्यास आणि या अर्जाबाबत एकही आक्षेप न आल्यास संबंधिताला जात पडताळणी समितीकडून १५ ते ९० दिवसात हे प्रमाणपत्र दिले जाते. जर अर्जावर आक्षेप आले असतील तर, त्याबाबतची चौकशी करून निकाल देण्यासाठी पडताळणी समितीला ६९ दिवसांची मुदत असते. या चौकशीत आक्षेपात काही तथ्य आढळलं नाही, तर अर्जदाराला लगेच प्रमाणपत्र द्यावं लागतं. आक्षेपात तथ्य आढळले तर, त्याबाबतचा निर्णय विहित कालावधीत द्यायचा असतो. अर्जात काही त्रुटी असल्यास जात पडताळणी समितीकडून त्याची माहिती दिली जाते आणि त्या त्रुटी दूर करण्यासाठी मुदत दिली जाते. दरम्यान अर्जदाराने या त्रुटी दूर केल्या नाहीत तर तर वैधता प्रमाणपत्र दिलं जात नाही.

जात वैधता प्रमाणपत्रासाठी सगळ्यांनाच शैक्षणिक पुरावे गरजेचे असतात. त्यातील काही पुरावे नसतील तर महसुली पुरावे जोडले तरीही हे प्रमाणपत्र मिळवता येतं. जात वैधता प्रमाणपत्र काढण्याआधी जात प्रमाणपत्र काढणं गरजेचं असतं. त्यासाठी कौटुंबिक वंशावळ लागते.

इथे जाऊन अर्ज करता येईल

जिल्ह्याच्या ठिकाणी असणारी सेतू सुविधा केंद्र, आपले सरकार सेवा केंद्र किंवा थेट वेबसाईटवर जाऊनही या प्रमाणपत्रासाठी अर्ज करता येतो. १९५९ ते १९६७ पूर्वीचे पुरावे अपुरे असतील आणि कागदपत्रांमध्ये खाडाखोड असेल तर जात पडताळणी समितीकडून प्रस्ताव अवैध ठरविला जातो.