यवतमाळ : ऑनलाइन वितरण प्रणालीमुळे रेशनचे धान्य काळ्या बाजारात विक्रीसाठी जात नाही, असा दावा पुरवठा विभाग करत असला तरी, रेशनच्या तांदळाची काळ्या बाजारात मोठ्या प्रमाणात विक्री सुरू असल्याचे प्रकरण उघडकीस आले. विदर्भात गोंदिया हे काळ्या बाजारातील रेशनच्या तांदुळाच्या खरेदी, विक्रीचे महत्वाचे केंद्र झाले आहे. दिग्रस येथून आर्णी, यवतमाळ मार्गे गोंदिया येथे वाहतूक होणार असल्याची माहिती मिळताच स्थानिक गुन्हे शाखेच्या पथकाने सापळा रचून ट्रक पकडला. ही कारवाई यवतमाळ नजीक मनदेव घाटात करण्यात आली. या कारवाईत ५७ लाख ६४ हजार २०० रुपयांचा मुद्देमाल जप्त करण्यात आला आहे.
शेख मोहसीन शेख कादर (३४, रा. देऊरवाडी पुनर्वसन, दिग्रस), हाफीज बेग सनाउल्ला बेग (३४, रा. बाराभाई मोहल्ला, दिग्रस) अशी गुन्हा दाखल झालेल्यांची नावे आहेत. रेशन दुकानासाठी शासनाकडून पाठविल्या जाणाऱ्या तांदळाची हेराफेरी करून काळ्या बाजारात विक्री केली जात असल्याची माहिती स्थानिक गुन्हे शाखेच्या पथकाला मिळाली होती. दरम्यान, एलसीबीचे पथक पेट्रोलिंग करीत असताना रेशनच्या तांदळाचा ट्रक गोंदिया येथे जाणार असल्याचे कळाले. त्यावरून पथकाने मनदेव घाटात सापळा रचला. यावेळी ट्रक ( क्र.एमएच २९ बीई ८५३२) येताना दिसताच पथकाने हा ट्रक अडवला. ट्रकमध्ये तांदूळ आढळला. यावेळी ट्रकमधील तांदळाबाबत आरोपींना विचारपूस केली असता, त्यांनी उडवाउडवीची उत्तरे दिली. तांदूळाची वैध कागदपत्र, बिल आढळून न आल्याने पथकाचा संशय पक्का झाला. त्यांनी ट्रकसह आरोपींना ताब्यात घेतले.
यवतमाळ तहसीलदारांकडून तांदूळ रेशनचा आहे की नाही, या संबंधाने अहवाल मागितला. तांदूळ रेशनचा असल्याचा अहवाल प्राप्त होताच आरोपींवर यवतमाळ ग्रामीण पोलीस ठाण्यात गुन्हे दाखल करण्यात आले. ही कारवाई पोलीस अधीक्षक कुमार चिंता, अपर पोलीस अधीक्षक पीयूष जगताप एलसीबीचे पोलिस निरीक्षक सतीश चवरे यांच्या मार्गदर्शनात एपीआय संतोष मनवर, योगेश गटलेवार, अजय डोळे, विनोद राठोड, प्रशांत हेडाऊ, नीलेश राठोड, रितुराज मेडवे, आकाश सहारे यांनी केली.
गोंदिया तांदूळ खरेदी विक्रीचे केंद्र
यवतमाळ येथे यापूर्वी सुद्धा रेशनचा काळ्या बाजारात जाणारा तांदूळ पकडण्यात आला होता. येथील तांदूळ गोंदिया जिल्ह्यात पाठवला जातो. स्थानिक पातळीवरून गोंदियापर्यंत एक मोठी साखळी असून, त्या माध्यमातून खरेदी विक्रीचे व्यवहार होतात. यात स्थानिक राशन दुकानदार, अधिकारी, व्यापारी, राईस मिल चालक आदी सहभागी असल्याची माहिती आहे. रेशनचा काळ्या बाजारात जाणारा तांदूळ पकडल्यानंतर चौकशीची सूत्रे गोंदियापर्यंत गेल्यास मोठा तांदूळ घोटाळा उघडकीस येण्याची शक्यता आहे.
