नागपूर: उच्च सुरक्षा क्रमांक पाटीची (एचएसआरपी) अंतिम मुदत जवळ आली आहे. त्यामुळे नागपूरसह राज्यभरातील पाटी बसवण्याच्या केंद्रावर वाहन चालकांची पाटी बसवण्यासाठी गर्दी वाढली आहे. त्याचा लाभ घेत काही केंद्रांवर ५० रुपये अतिरिक्त शुल्क वसूल केले जात आहे. नागपुरातही हा प्रकार पुढे आला. त्यामुळे पाटी बसवणाऱ्या कंपनीने मोठे पाऊल उचलले आहे. त्याबाबत आपण जाणून घेऊ या.
राज्यात १ एप्रिल २०१९ पूर्वीच्या सगळ्याच वाहनांना एचएसआरपी पाटी बंधनकारक आहे. ही पाटी बसवण्यासाठी १५ ऑगस्ट शेवटची मुदत आहे. त्याला आता केवळ एकच दिवस शिल्लक आहे. त्यामुळे मुदतीच्या आत पाटी लावण्यासाठी राज्यातील सर्वच अधिकृत केंद्रांवर पाटी लावण्यासाठी वाहन चालकांची गर्दी वाढत आहे. त्याचा गैरफायदा घेत काही केंद्र चालक वाहन धारकांकडून ५० रुपये अतिरिक्त घेत आहे. दरम्यान याबाबत कुणीही वाहन चालक लेखी तक्रारी करीत नसल्याचा गैरफायदा केंद्रचालकांकडून उचलला जात आहे.
दरम्यान, नवीन पाटी कमकुवत असून ती काही दिवसांतच तुटण्याचा धोका असल्याचे सांगत नागपुरातही ३०० ते ४०० रुपयांचे सुरक्षा आवरण घेण्याचा आग्रहही केंद्रचालकांकडून धरला जात आहे. तर एक केंद्र चालकाकडून फिटिग शुल्काच्या नावावर चक्क ५० रुपये प्रत्येक वाहन धारकाकडून वसुल केले जात होते. प्रत्यक्षात शासनाकडून आकारल्या जाणाऱ्या शुल्कात फिटिंगसह पाटी लावण्याचे शुल्कही समाविश्ट आहे. दरम्यान नागपुरात दोन केंद्रांबाबत तक्रारी आल्यावर एकाची मान्यता रद्द करण्यात आली तर दुसऱ्या केंद्रावरील काम थांबवण्यात आले, या वृत्ताला नागपुरातील प्रादेशिक परिवहन कार्यालयासह पाटी लावण्याचे कंत्राट मिळालेल्या कंपनीनेही दुजोरा दिला आहे.
राज्यात एचएसआरपी पाटी लावण्याबाबतचे दर किती?
राज्यात शासनाने निश्चित केलेल्या दरानुसार दुचाकी वाहनांसाठी सर्व कर व शुल्कासह (मोटारसायकल, स्कूटर, ट्रॅक्टर) ५३१ रुपये, तीन चाकी (ऑटो-रिक्षा) ५९० रुपये, चारचाकी आणि मोठी वाहने (कार, बस, ट्रक, टेम्पो) ८७९ रुपये इतका दर आकारण्यात आला आहे.
रोझमेर्टा सेफ्टी सिस्टम्स लिमिटेड कंपनीचे म्हणने काय?
फिटिंग शुल्काच्या नावावर कोणतेही अतिरिक्त शुल्क केंद्र चालकाला घेता येत नाही. नागपुरातील नितीन गिरी यांनी दाभा परिसरातील एका केंद्रावर ५० रुपये अतिरिक्त घेतले जात असल्याची तक्रार केल्यावर या केंद्रावरील काम थांबवले आहे, अशी माहिती रोझमेर्टा सेफ्टी सिस्टम्स लिमिटेडचे अधिकारी अमिर हुसेन यांनी लोकसत्ताशी बोलतांना दिली.
