साक्षात ‘विघ्नहर्ता’ मंडपात, तरीही चोरट्यांनी साधला डाव

महाल परिसरातील एका गणेश मंडळाची दानपेटी चोरट्यांनी पळवल्याची घटना बुधवारी उघडकीस आली आहे. सकाळी आरतीच्या वेळी मंडळांच्या कार्यकर्त्यांच्या निदर्शनास ही बाब आली. त्यांनी कोतवाली पोलीस ठाण्यात तक्रार केली. प्राप्त माहितीनुसार बुधवारी पहाटेच्या वेळी मंडपाजवळ राहणाऱ्या एका व्यक्तीच्या वाहनाने मंडळाच्या सचिवाच्या दुचाकीला धडक दिली. त्याचा आवाज ऐकल्यावर परिसरातील नागरिक उठले. मंडपात झोपणाऱ्यांनाही जाग आली. या गोंधळातच अज्ञात व्यक्तींनी मंडपातील दानपेटी पळवली. चोरट्यांनी त्यातील ५०० व १०० च्या नोटा घेतल्या, मात्र दहा आणि वीस रुपयांच्या नोटा पेटीतच ठेवल्या. कार्यकर्ते सकाळी आरतीसाठी आले असता त्यांना दानपेटी मंडपात दिसली नाही. त्यांनी त्याचा शोध घेणे सुरू केले असता मंडपाच्या मागच्या बाजूला दानपेटी सापडली. चोरट्यांनी त्यातून सात ते आठ हजार रुपये पळवल्याची माहिती आहे. या प्रकरणाचा सध्या पोलीस तपास करीत आहेत.

हेही वाचा – नागपूर विद्यापीठाने ऐनवेळी रद्द केले होते सीताराम येच्युरी यांचे व्याख्यान

महाल भागात राष्ट्रीय स्वंयंसेवक संघाचे मुख्यालय असल्याने परिसरात अत्यंत कडेकोट सुरक्षा व्यवस्था तैनात असते. त्याच परिसरात ही घटना घडली. चोरट्यांनी विघ्नहर्त्यालाही सोडले नाही. दरम्यान सार्वजनिक गणेश मंडळाना परवानगी देताना महापालिकेने सुरक्षेची जबाबदारी मंडळावर टाकली आहे. त्यामुळे प्रत्येक ठिकाणी रात्रीच्या वेळी मंडळाचे कार्यकर्ते मंडपात गस्त घालतात. उशिरा रात्रीपर्यंत तेथे कार्यकर्त्यांची ये-जा सुरू असते. महाल हा नागपूरचा जुना भाग आहे. तेथे दाटीवाटीची लोक वस्ती आहे. अशा स्थितीत मंडपातून दानपेटी चोरीला जाणे व ते कोणालाही न कळणे याबाबत आश्चर्य व्यक्त केले जात आहे.

हेही वाचा – बापरे, उच्च न्यायालयाच्या न्यायमूर्तींच्या नावानेही फसवणूक

नागपूरमध्ये अनेक मोठी गणेश मंडळ असून दरवर्षी ते मोठ्या उत्साहात गणेशोत्सव साजरा करतात. अनेक भाविक गणेशाच्या दर्शनाच्या वेळी कमी-अधिक प्रमाणात दान करीत असतात. दानपेटी चोरीच्या घटनेमुळे आता मंडळाच्या व दानपेटीच्या सुरक्षेचा प्रश्न निर्माण झाला आहे. पोलिसांकडून गृहरक्षक दलाचे जवान ठिकठिकाणी तैनात करण्यात आले आहे.