अमरावती: भाजपच्या नेत्या आणि माजी खासदार नवनीत राणा यांना पुन्हा एकदा अत्यंत गंभीर स्वरूपाची ठार मारण्याची आणि लैंगिक हिंसेची धमकी मिळाली आहे. हैदराबाद येथील अब्दुल नावाच्या व्यक्तीकडून स्पीड पोस्टद्वारे हे धमकीचे पत्र नवनीत राणा यांच्या अमरावती येथील निवासस्थानी पाठवण्यात आले आहे. आठवड्याभरात ही दुसरी धमकी असून, या वारंवार होणाऱ्या धमक्यांमुळे त्यांच्या सुरक्षेचा प्रश्न पुन्हा ऐरणीवर आला आहे.
या गंभीर घटनेनंतर नवनीत राणा यांचे खासगी स्वीय सहाय्यक मंगेश कोकाटे यांनी राजापेठ पोलीस ठाण्यात तक्रार दाखल केली आहे. राजापेठ पोलिसांनी त्वरित गुन्हा नोंदवून तपास सुरू केला आहे.
नवनीत राणा यांच्या निवासस्थानी ३० ऑक्टोबर रोजी स्पीड पोस्टद्वारे एक पांढरा बंद लिफाफा प्राप्त झाला. तो लिफाफा आज उघडून पाहिल्यानंतर हे पत्र अब्दूल नावाच्या व्यक्तीने हैदराबाद येथून पाठवल्याचे स्पष्ट होते. पत्रातील मजकूर धमकीचा असून नवनीत राणा यांना अत्यंत गलिच्छ भाषेत शिवीगाळ करण्यात आली आहे. ठार मारण्याची आणि लैंगिक हिंसेची धमकी देण्यात आली आहे, असे मंगेश कोकाटे यांनी तक्रारीत नमूद केले आहे.
यापूर्वीसुद्धा नवनीत राणा यांना अशाच प्रकारची दोन पत्रे प्राप्त झाली होती. त्या दोन्ही पत्रांमधील भाषाशैली आणि मजकूर सध्याच्या पत्रासारखाच आहे. त्यामुळे मागील दोन पत्रे पाठवणारी आणि हे पत्र पाठवणारी व्यक्ती एकच असल्याचा आम्हाला ठाम संशय आहे, असे तक्रारीत म्हटले आहे.
आठवडाभरापूर्वी धमकी
यापूर्वी जावेद नावाच्या व्यक्तीने पाठवलेल्या या पत्रात, ‘माझ्याकडे ५० जणांची टोळी (गँग) आहे, तुझ्यावर गँगरेप करून मारून टाकू,’ अशा भयंकर व आक्षेपार्ह शब्दांत धमकी देण्यात आली आहे. या प्रकरणी राजापेठ पोलीस ठाण्यात गुन्हा नोंदविण्यात आला आहे.
हे धमकीचे पत्र स्पीड पोस्टच्या माध्यमातून नवनीत राणा यांच्या येथील निवासस्थानाच्या पत्त्यावर आले होते. पत्रातही अत्यंत खालच्या स्तराची भाषा वापरण्यात आली आहे. माजी खासदार नवनीत राणा यांना यापूर्वीही अनेकदा धमक्या आल्या आहेत. गेल्या ऑगस्ट महिन्यातही त्यांना समाज माध्यमावरील माध्यमातून अश्लील शिवीगाळ करत जीवे मारण्याची धमकी देण्यात आल्याचा प्रकार उघडकीस आला होता.
कायदा व सुव्यवस्थेवर प्रश्नचिन्ह निर्माण करणाऱ्या आणि लोकप्रतिनिधींना धमकावणाऱ्यांविरुद्ध कठोर कारवाई करण्याची मागणी राजकीय व सामाजिक स्तरावरून जोर धरू लागली आहे.
