गोंदिया:– चालू आर्थिक वर्ष संपायला आता फक्त तीन दिवस उरले आहेत. या तीन दिवसांत महावितरणने चालू व थकीत वीजबिलांची वसुली जोमाने सुरू केली आहे. घरगुती व व्यावसायिक ग्राहक तसेच शासकीय कार्यालयां कडून ही थकीत वीज बिलांच्या वसुली साठी कठोर कारवाई करण्यात आली आहे. याअंतर्गत गोंदिया शहरातील जैस्तंभ चौकात असलेल्या नवीन प्रशासकीय इमारतीने थकबाकीचे बिल न भरणाऱ्यांवर कारवाई करत महावितरण ने बुधवार २७ मार्च रोजी प्रशासकीय इमारतीचे वीज कनेक्शन कापले आहे. प्रशासकीय इमारतीवर सुमारे २.६७ लाख रुपयांहून अधिक वीज बिल थकबाकी असल्याचे उघड झाले आहे. त्यामुळे ही कारवाई करण्यात आली आहे.
वयोवृद्ध,दिव्यांगांना अधिकारी, कर्मचारी आणि नागरिकांच्या समस्या भेडसावत आहेत.विशेष म्हणजे या प्रशासकीय इमारतीमध्ये उपविभागीय अधिकारी कार्यालय, दुय्यम निबंधक कार्यालय, पणन कार्यालय, अन्न व नागरी पुरवठा विभाग कार्यालय, जिल्हा अधीक्षक कृषी अधिकारी कार्यालय, जिल्हा माहिती अधिकारी कार्यालय,अन्न व औषध कार्यालय यांसह एकूण ३२ असे शासकीय कार्यालये एकाच छताखाली आहेत. अशा परिस्थितीत दररोज हजारो नागरिक आपापल्या कामांसाठी येथे येत असतात. पुरवठा खंडित करण्या पूर्वी वीज विभागाने थकबाकीदार वीजबिल भरण्याची सूचना संबंधित अधिकाऱ्यांना केली होती. त्यानंतर काही रक्कम अदा करण्यात आली, मात्र थकीत रक्कम न भरल्याने ही कारवाई करण्यात आली आहे.
प्रशासनाने बिल भरले नाही तर…
संबंधित अधिकाऱ्यांच्या मागणीवरून कार्यालयाच्या इमारतीच्या आतच वीजपुरवठा सुरू करण्यात आल्याचे सांगण्यात आले. तर बाह्य क्षेत्राला होणारा पुरवठा खंडित झाला आहे. त्यामुळे या चार मजली इमारतीतील लिफ्ट बंद पडल्याने मोठी अडचण निर्माण झाली आहे. या इमारतीत दोन लिफ्ट असून त्याद्वारे अधिकारी, कर्मचारी तसेच सर्वसामान्य नागरिक विविध कार्यालयात जातात. मात्र बाहेरील भागातील वीजपुरवठा खंडित झाल्याने त्याचा परिणाम लिफ्ट तसेच पाणीपुरवठा व्यवस्थेवर झाला असून येथे येणाऱ्या नागरिकांना प्रचंड त्रास सहन करावा लागत आहे. विशेषत: दिव्यांग नागरिकांना याचा फटका बसत आहे. अनेक व्हरांड्यात अंधार आहे. ही सर्व महत्त्वाची सरकारी कार्यालये आहेत. सदर प्रशासकीय इमारतीत वीज पुरवठा कधी पासून सुरळीत होतो हे पाहायचे आहे की आता हे कधी पूर्ववत होणार…
अनेक विभागांनी बिल सादर केले नाही
प्रशासकीय इमारतीत विविध विभागांचे कार्यालये आहेत. वारंवार सूचना देऊनही अनेक कार्यालयांची वीज बिले अनेको महिन्यांपासून भरलेली नाहीत. त्यामुळे मोठी थकबाकी मुळे हे घडले. सध्या वीजपुरवठा केवळ बाह्य भागात खंडित करण्यात आला आहे. कार्यालयीन कामकाज सध्या सुरळीत सुरू आहे. याबाबत संबंधित वरिष्ठ अधिकाऱ्यांना कळवून पुढील कार्यवाही केली जाईल.आज शुक्रवारी दुपारी १:३० ला येथील सर्व विभाग प्रमुखांची तातडीची बैठक बोलावून शेवटची सूचना दिली गेली. -चंद्रभान खंडाईत, उपविभागीय अधिकारी, गोंदिया
