उच्च न्यायालयाच्या न्यायमूर्ती पदासाठी पाच नागपूरकरांच्या नावांची शिफारस

नागपूर : उच्च न्यायालयाच्या न्यायमूर्ती पदासाठी मुंबई उच्च न्यायालय प्रशासनाने २२ व्यक्तींच्या नावांची शिफारस सर्वोच्च न्यायालयाच्या कॉलेजिअमकडे केली आहे. त्यात पाच नागपूरकरांचा समावेश आहे.

नागपूरचे प्रधान जिल्हा व सत्र न्यायाधीश संजय मेहरे, विधि व न्याय विभागाचे प्रधान सचिव आर.एन. लढ्ढा, हायकोर्ट बार असोसिएशनच्या अध्यक्ष डॉ. गौरी व्यंकटरमण, अ‍ॅड. मरकड अग्निहोत्री, अ‍ॅड. अभय सांबरे आणि अ‍ॅड. रणजीत भुईभार यांच्या नावांचा समावेश आहे. मुंबई उच्च न्यायालय व खंडपीठांमध्ये न्यायमूर्तीची अनेक पदे रिक्त आहेत. या पदांवर न्यायमूर्तीची नियुक्ती करण्यासाठी राज्याच्या मुख्य न्यायमूर्तीनी सर्वोच्च न्यायालयाच्या कॉलेजिअमकडे २२ नावांची शिफारस केली. या २२ नावांमध्ये सहा नावे नागपूर व विदर्भातील आहेत.

यातील न्या. संजय मेहरे हे मूळचे अकोला येथील आहेत. ते सध्या नागपूर जिल्हा व सत्र न्यायालयाचे प्रधान न्यायाधीश म्हणून कार्यरत असून वरिष्ठ आहेत. विधि व न्याय विभागाचे प्रधान सचिव आर.एन. लढ्ढा हे मूळचे यवतमाळचे आहेत.

इतर वकील नागपूर हायकोर्टात अनेक वर्षांपासून वकिली करतात. उच्च न्यायालयाच्या शिफारशीनंतर सर्वोच्च न्यायालयातील तीन  वरिष्ठ न्यायमूर्ती या नावांचा अभ्यास करतील व त्यातील काही नावांची शिफारस विधि व न्याय विभागामार्फत राष्ट्रपतींना करतील. केंद्र सरकारचा हिरवा कंदील झेंडी मिळताच राष्ट्रपती त्यांच्या नियुक्तीची घोषणा करतील. सध्या मुंबई उच्च न्यायालयात ९४ न्यायमूर्तीची पदे मंजूर आहेत. त्यापैकी ६९ कार्यरत असून २५ रिक्त आहेत, हे विशेष.