शेतकरी कर्जमाफी लवकरच! महसूलमंत्री चंद्रशेखर बावनकुळे यांचे संकेत

चिखली येथील ‘देवाभाऊ लाडकी बहीण महिला नागरी सहकारी पतसंस्था’चे उद्घाटन आज, शनिवारी राज्याचे महसूल मंत्री चंद्रशेखर बावनकुळे यांच्या हस्ते करण्यात आले. यावेळी कामगार मंत्री आकाश फुंडकर, संस्थेच्या संस्थापक अध्यक्ष आमदार श्वेता महाले, आमदार संजय गायकवाड, माजी आमदार विजयराज शिंदे, शशिकांत खेडेकर, तोताराम कायदे, जिल्हाधिकारी डॉ. किरण पाटील, उपविभागीय अधिकारी शरद पाटील, तहसीलदार संतोष काकडे उपस्थित होते.

यावेळी महसूलमंत्री चंद्रशेखर बावनकुळे म्हणाले, शासन गोरगरीब, शेतकरी व सामान्य नागरिकांसाठी काम करत आहे. लाडक्या बहिणींना दरमहा १,५०० रुपये दिले जात आहेत, शेतकऱ्यांना मोफत वीज दिली जात आहे, लवकरच समितीचे सर्व्हेक्षण पूर्ण करून गरजू शेतकऱ्यांना कर्जमाफी देण्यासाठी शासन प्रयत्नशील आहे. स्वस्तात शेतजमीन मोजणी, विद्यार्थ्यांना प्रमाणपत्रे अल्पदरात उपलब्ध करणे, नकाशा योजनेद्वारे प्रॉपर्टी कार्ड, स्वामित्व योजना, पाणंद रस्ता, तुकडेबंदी कायदा रद्द करणे, असे ऐतिहासिक निर्णय शासनाने घेतले आहेत. चिखली तालुक्यातील जिवंत सातबारा मोहिम संपूर्ण राज्यासाठी प्रेरणादायी ठरली. यामुळे ती राज्यभर राबविण्याचा निर्णय घेतल्याचे महसूल मंत्री बावनकुळे यांनी सांगितले.

कामगार मंत्री आकाश फुंडकर म्हणाले, चिखली तालुका पतसंस्थांचे माहेरघर आहे. ‘देवाभाऊ लाडकी बहीण पतसंस्थे’मुळे महिलांना बचत ठेवण्याचे हक्काचे ठिकाण मिळाले आहे. केवळ अल्पावधीत २,५०० बहिणींनी येथे खाते उघडून हे सिद्ध केले आहे.

आमदार श्वेता महाले यांनी प्रास्ताविकातून संस्थेच्या योजनांची माहिती दिली. त्यांनी सांगितले की, ‘देवाभाऊ लाडकी बहीण पतसंस्था’ ही महाराष्ट्रातील पहिली महिलांची नागरी पतसंस्था असून, महिलांच्या आर्थिक सक्षमीकरणाचा नवा टप्पा ठरेल. या उपक्रमाचा उद्देश आर्थिकदृष्ट्या दुर्बल घटकातील महिलांना स्वावलंबी बनवणे होय. लोकसंख्येतील सुमारे ४० टक्के हिस्सा असलेल्या महिलांना उद्योग, व्यवसाय व आर्थिक व्यवहारात प्रोत्साहन देणे हा उद्देश असल्याचे त्यांनी सांगितले. उद्घाटन सोहळ्यास स्थानिक मान्यवर, नगरसेवक, सामाजिक कार्यकर्ते, तसेच विविध महिला बचतगटांच्या प्रतिनिधी, नागरिक उपस्थित होते.