Bogus Voters Buldhana: बुलढाणा : शिवसेना शिंदे गटाचे आमदार संजय गायकवाड यांनी मतदार एक लाखावर बोगस मतदार असल्याचा दावा करीत विरोधकांच्या मत घोटाळ्याच्या आरोपात सुरात सूर मिळवला आहे.एकट्या बुलढाणा शहराच्या मतदार यादीत किमान ४ हजार मतदारांचा घोळ आहे .तब्बल ४ हजार नागरीकांची दोन वेळा नावे आहे. मृत मतदारांची, येथून बदलून गेलेल्या अधिकाऱ्यांची नावे अजूनही कायम आहे, असे गंभीर आरोप संजय गायकवाड यांनी केले आहे. बुलढाणा जिल्ह्याच्या याद्यात असाच घोळ असून एक लाखापेक्षा जास्त बोगस मतदार असल्याचा दावा त्यांनी केला.
दरम्यान यासंदर्भात आपण निवडणूक आयुक्त, मुख्य निवडणूक अधिकारी दिनेश वाघमारे यांच्या समवेत फोन वर चर्चा केली. तसेच याद्यात सुधारणा, मृतांची, डबल नावे वगळण्याची मागणी केली. ही नावे वगळली का जात नाही, असा कोणता कायदा आहे की मृत व दोनदा आलेली नावे वगळण्यात येत नाही? असा सवाल त्यांनी केला.मृतकांची नावे काढण्या करिता त्यांचा मृत्यू दाखला आधारकार्ड व मतदार यादीशी लिंक केले पाहिजे. मी स्वतः जिल्हाधिकाऱ्यांना पत्र लिहिले आहे की, बुलढाणा शहरातील चार हजार नावे डबल आहे,ती डिलीट झाली पाहिजे
भाजपचाही आक्षेप
दरम्यान यापूर्वी भाजपचे जिल्हाध्यक्ष विजयराज शिंदे आणि बुलढाणा शहर अध्यक्ष मंदार बाहेकर यांनीही स्थानिक स्वराज्य संस्थासाठीच्या मतदार यादीवर गंभीर आक्षेप घेतले होते. स्थानिक स्वराज्य संस्थांना १ जुलै २०२५ पर्यंतच्या मतदार याद्या आगामी निवडणुकांसाठी ग्राह्य धरण्यात येणार आहे. प्रसिद्ध याद्यावर भाजपा जिल्हाध्यक्ष विजयराज शिंदे व शहराध्यक्ष मंदार बाहेकर यांनी आक्षेप नोंदवून बोगस व पुनरावृत्ती झालेले मतदार वगळण्याची मागणी सहपालकमंत्री संजय सावकार व जिल्हाधिकारी बुलढाणा यांच्याकडे केली होती. या तक्रार निवेदनाची सहपालक मंत्री सावकारे यांनी गंभीर दखल घेऊन जिल्हाधिकारी किरण पाटील यांना चौकशीचे आदेश दिले होते.
बुलढाणा विधानसभा मतदार संघातील जवळपास ३५४६ मतदार हे पुन्हा पुन्हा नोंदणी केलेले आहे. त्याच प्रमाणे बुलढाणा शहरातही जवळपास ८०० मतदार पुन्हा पुन्हा नोंदणी केलेली आहे तर काही मृतकांची नावे आजही मतदार यादीत समाविष्ट आहे, असे तक्रारीत नमुद करण्यात आले होते.सदर मतदान हे निर्णायक स्वरूपाचे ठरू शकते, राजकीय हस्तक्षेप करून ही नावे हेतू पुरस्कर पुन्हा नोंदवली गेल्याचे दिसून येत आहे. या नावांचे सूक्ष्म अवलोकन केले असता नाव, वय, पत्ता व यादी भाग क्रमांक यामध्ये बऱ्यापैकी साधर्म्य आढळत आहे. संपूर्ण यादीत मोठ्या स्वरुपात झालेला दिसून येत आहे. अश्या बोगस व मृत मतदारांना मुळे निवडणुकांची पारदर्शकता व विश्वासार्हता कमी होत असून आदर्श आचारसंहितेचा भंग होणार असल्याचे निवेदनात नमूद करण्यात आले होते.
