भंडारा: सोमनाळा बुज जिल्हा परिषद शाळा शिक्षकांविना; विद्यार्थी शाळा सोडण्याच्या मनस्थितीत

जिल्हा परिषद उच्च प्राथमिक शाळा सोमनाळा बुज येथे १ ते ७ पर्यत वर्ग असून आता एकूण १०६ विद्यार्थी पटावर आहेत. मागील सत्र वर्ष २०२२ – २३ मध्ये ४ शिक्षक व करार पध्दतीवर नियुक्त १ असे एकूण ५ शिक्षक कार्यरत होते. नुकताच झालेल्या आंतरजिल्हा बदलीत शाळेतील ३ शिक्षक बदली होऊन गेल्यानंतर त्यांचे ठिकाणी फक्त एकच शिक्षक नव्याने रूजू झाले असून १ ते ७ वर्ग असलेल्या शाळेत सध्या फक्त दोनच शिक्षक कार्यरत आहेत.
परीणामी शिक्षकांअभावी पाल्याचे शैक्षणिक नुकसान होऊ नये म्हणून पालक आपल्या मुलांना गावातील जिल्हा परिषद शाळेतून काढून इतर खाजगी शाळेत प्रवेश घेण्याचा विचार करत आहेत. शाळा सुरू होऊन दोन पाच दिवस झाले .

हेही वाचा >>>बुलढाणा: नाल्याला आलेल्या पुरात बैलगाडीसह तिघे वाहून गेले; दोघे बचावले एक बेपत्ता

मात्र पाचच दिवसात दाखला काढण्यासाठी अनेक अर्ज प्राप्त झाले असून हे असेच सुरू राहीले तर गावची एकमेव असलेली सरकारी शाळा ओस पडेल आणि गरीबांच्या मुलांना शिक्षण घेणे कठीण होईल या भितीने गावातील सुशिक्षित तरुण व पालकांनी गुरुपौर्णिमेच्या दिवशी संतप्त होत शाळेवर मोर्चा काढला आणि “शिक्षक नाही तर शाळाच चालू देणार नाही” अशी भुमिका घेतली. त्यावेळी शाळा व्यवस्थापन समितीने मध्यस्थी करत लवकरच आवश्यक शिक्षक उपलब्ध केले जातील असा शब्द देत पालकांची समजूत काढली. असे झाले नाही तर आम्ही स्वतःच शाळेला कुलूप बंद करू व शिक्षक उपलब्ध होईस्तोवर आंदोलन करू असा इशारा दिला.

हेही वाचा >>>मोर्शीचे आमदार देवेंद्र भुयार यांचा शरद पवारांना पाठिंबा

हा प्रश्न केवळ सोमनाळा.बूज या एकाच शाळेचा प्रश्न नसून जिल्ह्यात अशा अनेक शाळा आता अशा उदासीन धोरणामुळे बंद होण्याच्या मार्गावर आहेत. सरकारने लवकरात लवकर शिक्षक भरती करून यावर कायमस्वरूपी तोडगा काढावा.-दिगांबर कुंडलिक वंजारी
शाळा व्यवस्थापन समिती सदस्य व सामाजिक कार्यकर्ता सोमनाळा