राज्यात अतिवृष्टीचे गंभीर संकट, एसटीचे ३४ आगार प्रमुख बेपत्ता; महामंडळाकडून कारवाई…

राज्यात मागील काही दिवसांपासून परतीच्या पावसाने थैमान घातले आहे. मराठवाडा आणि मध्य महाराष्ट्रातील अनेक जिल्ह्यांमध्ये पूर परिस्थिती निर्माण झाल्याने अनेक रस्ते बंद आहेत, पुलावर पाणी आले आहे. अशा परिस्थितीमध्ये एसटीची वाहतूक अनेक ठिकाणी ठप्प झाली आहे. अनेक प्रवासी बसस्थानकावर अडकून पडले आहेत. अशा गंभीर परिस्थितीमध्ये आपल्या मुख्यालयात हजर राहून आपले कर्तव्य जबाबदारीने पार पाडणे ऐवजी काही आगार प्रमुख कर्तव्यावर गैरहजर असल्याचे एसटीच्या गोपनीय अहवालातून पुढे येत आहे.

दरम्यान या गैरहजर आगारप्रमुखांनी परिस्थितीचे गांभीर्य न ओळखता अत्यंत बेजबाबदार वर्तन केले आहे. या कर्तव्यात कसूर करणाऱ्या आगारप्रमुखांना संबंधित प्रादेशिक व्यवस्थापक यांनी कारणे दाखवा नोटीस बजावण्याच्या सूचना महामंडळ मुख्यालयाकडून करण्यात आल्या ाहे. त्यामध्ये आगार प्रमुखांचा खुलासा समाधानकारक नसल्यास त्यांच्यावर प्रशासकीय कारवाई करण्यात येईणार असल्याचा महामंडळाचा दावा आहे. हे आगारप्रमुख ज्या विभाग नियंत्रकांच्या अखत्यारित काम करतात त्या विभाग नियंत्रकांना देखील याबाबत विचारणा केली जाणार असल्याचे परिवहन मंत्री प्रताप सरनाईक यांच्या खात्याकडून स्पष्ट केले गेले आहे.

आगार प्रमुखांवर पालक म्हणून…

आगारप्रमुख हा एसटी प्रशासनाचा मुख्य घटक आहे. त्याच्या हाताखाली शेकडो कर्मचारी काम करत असतात. तो ज्या आगारात कार्यरत असतो, तेथे अनेक बसेस रात्रपाळीला मुक्कामी असतात. तसेच लाखो रुपये किमतीचे ऑइल, इंधन व इतर सुटे भाग तिथे असतात. याबरोबरच तिकीट विक्री मधून आलेली मोठी रक्कम देखील आगारात ठेवण्यात आलेली असते. अशा परिस्थितीमध्ये एक पालक म्हणून आगारप्रमुखांवर मोठी जबाबदारी असते. त्याने आगारात दररोज उपस्थित राहून या सर्वांना मार्गदर्शन करणे व त्यांच्यावर अंकुश ठेवणे गरजेचे असते. परंतु काही आगारप्रमुख हे आपल्या आगारात उपस्थित नसल्याचे सुरक्षा व दक्षता खात्याच्या गोपनीय अहवालात स्पष्ट झाल्याने या आगार प्रमुखांच्या कामावर गंभीर प्रश्नचिन्ह उपस्थित झाले आहे.