भंडारा : पवनी तालुक्यातील अड्याळ येथील हिवरकर पोलीस भरती पूर्व प्रशिक्षण केंद्रात प्रशिक्षण घेत असलेल्या एका प्रशिक्षणार्थी महिलेसोबत केंद्र संचालक तथा शिक्षक नितेश दामा हिवरकर सोनेगाव (पहेला) याने अश्लील शब्दात जातीवाचक शिवीगाळ देत शरीर सुखाची मागणी केल्याची ध्वनिफीत प्रसारित झाल्यानंतर एकच खळबळ उडाली आहे.
२८ जुलै रोजी रात्रीच्या सुमारास हिवरकर यांनी या महिलेला दूरध्वनी वरून संपर्क करत जातीयवादी शब्दाचा वापर केला. इतकेच नव्हे तर त्या महिला प्रशिक्षणार्थीला पैशांचे आमिष दाखवून शारीरिक संबंधांची मागणी केली. समाज माध्यमावर ही ध्वनिफीत प्रसारित होताच समाज माध्यमांवर प्रतिक्रिया उमटू लागल्या आहे.
या प्रकरणी अड्याळ पोलीस स्टेशन येथे नितेश दामा हिवरकर (४०) याच्या विरोधात भारतीय न्याय संहिता बीएनएस 2023-75(2), भारतीय न्याय संहिता बी एन एस 2023-352, भारतीय न्याय संहिता बीएनएस 2023- 351(2) अनुसूचित जाती आणि अनुसूचित जमाती अत्याचार प्रतिबंधक अधिनियम 1989, अनुसूचित जाती आणि अनुसूचित जमाती प्रतिबंधक अधिनियम 1989 3(1ं )(S) या विविध कलमाद्वारे गुन्हा दाखल करून अटक करण्यात आला आहे.
जातीय तेढ निर्माण करू नये
नितेश दामा हिवरकर सोनेगाव याला अटक करण्यात आली असून त्याच्या विरोधात विविध कलमाद्वारे गुन्ह्याची नोंद पोलीस स्टेशन अड्याळ येथे करण्यात आली. पुढील तपास भंडारा पोलीस अधीक्षक नुरुल हसन यांचे मार्गदर्शनात उपविभागीय पोलीस अधिकारी मनोज सिडाम तथा पोलीस स्टेशन अड्याळ पोलीस उपनिरीक्षक धनजंय पाटील करीत आहेत. या प्रकरणात जातीय तेढ निर्माण करून सामाजिक वातावरण दूषित न करण्याचे आवाहन पोलीस प्रशासनाने केले आहे.
