नागपूर शहरात आजपासून ट्रॅव्हल्सला ‘नो एन्ट्री’

गणेशोत्सवाचा काळ लक्षात घेता वाहतूक शाखेचे पोलीस उपायुक्त लोहित मतानी यांनी जारी केलेल्या नव्या आदेशानुसार पुढील महिनाभर खासगी ट्रॅव्हल्स बस चालकाना शहरात प्रवेशासाठी बंदी लागू राहणार आहे. शहराची लोकसंख्या अंदाजे ३० ते ३२ लाखाच्या आसपास आहे. त्यात सध्याच्या स्थितीत अंदाजे २० लाख दुचाकी आणि ५ लाख चारचाकी वाहने रस्त्यावर धावतात. शहरातील सुरू असलेल्या विविध विकासकामांमुळे आधीच रस्त्यांची रुंदी कमी झाली आहे. त्यातून वाहतूक कोंडी वाढत आहे. सकाळी व सायंकाळी रोज चाकरमान्यांना संथ वाहतूक आणि कोंडीचा सामना करावा लागतो.

यातच केंद्रिय मार्ग, विजय टॉकीज चौक, कॉटन मार्केट, व्हेरायटी चौक, रहाटे कॉलनी, रविनगर, वाडी, हिंगणा, दिघोरी नाका , ऑटोमोटिव्ह चौकांसारख्या महत्वाच्या चौकांवर खाजगी ट्रॅव्हल्सच्या अनधिकृत पिकअप-ड्रॉपमुळे कोंडी, वायू आणि ध्वनीप्रदूषण वाढत आहे. वाहतूक पोलिसांनी घेतलेल्या नोंदीनुसार सध्या शहरात रोज वेगवेगळ्या मार्गांनी ६४२ खासगी ट्रॅव्हल्सच्या बसेस धावतात. यात या मार्गावरील वाहनांचा समावेश आहे. त्यामुळे वाहतूक शाखेने हा धाडसी निर्णय घेतला आहे.

शहरात ट्रॅव्हल्सची अशी होते गर्दी

कोणता मार्ग- एकूण बस

वर्धा मार्ग- वर्धा, यवतमाळ, चंद्रपूर- ६४२

अमरावती मार्ग- अमरावती, पुणे, नाशिककडे- १९०

छिंदवाडा मार्ग- ७८

जबलपूर मार्ग- भोपाल, इंदोर- २९६

भंडारा मार्ग- गोंदिया, छत्तीसगड- ९२

उमरेड मार्ग- गडचिरोली- ३०८

यांना मिळेल सुट

एस.टी. महामंडळाच्या बस

मिहान, एमआयडीसी कंपनी बस

विवाह व खासगी कार्यक्रमासाठीच्या बस

अॅम्ब्युलन्स, आपत्कालीन सेवा, शालेय वाहने

जेष्ठ नागरिक, महिला स्पेशल, देवदर्शन गाड्या

बहुतेकांकडे अधिकृत पार्किंग व्यवस्था नाही. पिकअप-ड्रॉपवेळी रस्त्याच्या मधोमध बस उभ्या रहात असल्याने कोंडी होऊन अपघातांचा धोका वाढतो. ज्या ट्रॅव्हल्स कंपनीकडे स्वतःची पार्किंग व्यवस्था असेल, त्यांनाच शहरात प्रवेश मिळेल. उर्वरितांना आतल्या वळण मार्गावर बस थांबवावी लागेल. खासगी बस चालकांना पर्यायी व्यवस्था करण्यासाठी ७ दिवसांची मुदत आहे. अधिसूचना मोडणाऱ्यांवर भारतीय न्यायसंहिता २०२३ चे कलम २२३ अंतर्गत कारवाई होईल.लोहित मतानी, पोलिस उपायुक्त, वाहतूक शाखा