नागपूर : सूफी संत बाबा ताजुद्दीन यांचा वार्षिक ऊर्स ताजाबाद शरीफ येथे मोठ्या उत्साहात साजरा होत आहे. यानिमित्त हजरत बाबा ताजुद्दीन ट्रस्ट कार्यालयातून दरबारी शाही संदल मंगळवारी काढण्यात येणार आहे. संदल ताजाबादच्या बुलंदद्वार येथून निघाल्यानंतर उमरेड रोड, शीतला माता मंदिर, सक्करदरा चौक, अशोक चौकपासून महाल, इतवारी, गांधीबागच्या ज्या मार्गावरुन बाबा ताजुद्दीन आपल्या जीवनकाळात फिरले त्या मार्गाने फिरविण्यात येईल.
केंद्रीय रस्ते वाहतूक व महामार्ग मंत्री नितीन गडकरी यांनी संत हजरत बाबा ताजुद्दीन यांच्या १०३ व्या उर्सनिमित्त आयोजित उत्सवाला मोठा ताजबाग येथे रविवारी रात्री उशिरा भेट दिली. ‘संत ताजुद्दीन बाबा यांचा आशीर्वाद घेण्यासाठी नागपुरात येतात. या परिसराचे सौंदर्यीकरण झाले, मात्र आता गोरगरीब रुग्णांच्या उपचारासाठी एक मोठे हॉस्पिटल व्हावे अशी इच्छा आहे,’ अशी भावना गडकरी यांनी व्यक्त केली.
हजरत बाबा ताजुद्दीन यांचा १०३ वा वार्षिक उरूस शुक्रवार १८ जुलैपासून सुरू झाला आहे. यानिमित्त ताजुद्दीन बाबांवर श्रद्धा असलेले लाखो भाविक नागपुरात आले आहे. ताजबाग येथून मंगळवारी (२२ जुलै) शाही संदल निघणार आहे. शाही संदल ज्या मार्गाने प्रस्थान करेल तो ताजबागचा रस्ता सक्करदरा चौक ते दिघोरी चौक वाहतुकीसाठी पूर्णपणे बंद केला जाणार आहे.
मिरवणुकीत वाहतुकीची कोंडी होऊ नये म्हणून, या मार्गावरची सर्व प्रकारची वाहने पर्यायी मार्गावर वळवली जाणार आहेत. संदल मिरवणुकीदरम्यान तीनगल चौक ते शहीद चौक एकेरी वाहतूक करण्यात येणार आहे. या मार्गावर संदल मिरवणूक व दुचाकी वाहने सोडून इतर सर्व वाहनांना प्रवेश बंद राहील. बंद केलेल्या मार्गावरील वाहतूक आवश्यकतेनुसार पर्यायी मार्गावर वळवण्यात येत आहे.
संबंधित चौक येणारी वाहतूक ही वेळेनुसार इतरत्र पर्यायी मार्गावर वळवण्यात येईल. आवश्यकतेनुसार इतरत्र वाहतूक वळवण्याचे अधिकार वाहतूक शाखा पोलीस अधिकाऱ्यांना देण्यात आल्याचे वाहतूक शाखेचे पोलीस उपायुक्त लोहित मतानी यांनी जारी केलेल्या परिपत्रकातून स्पष्ट केले.
या मार्गावर वाहतूक बदल
- नागपूरकडून उमरेडकडे जाणाऱ्या बसेस व इतर वाहतूक बैद्यनाथ चौक, मेडिकल चौक, क्रीडा चौक, तुकडोजी पुतळा चौक, मानेवाडा चौक, म्हाळगीनगर चौक, चामट चक्की चौक मार्गे उमरेड रोडचा वापर करतील.
- उमरेड मार्गाकडून नागपूर शहरात येणारी वाहतूक दिघोरी नाका, चामट चक्की चौक डावे वळण घेऊन वळणरस्ता म्हाळगीनगर, मानेवाडा चौक, तुकडोजी पुतळा, मेडिकल, बैद्यनाथ चौक मार्गे वळवली जाईल.
- बॉलीवूड सेंटरकडून चक्रधरनगर बगीचा, भांडे प्लॉट चौकाकडे जाणारी वाहतूक बंद करून ती छोटा ताजबाग चौक, सक्करदरा चौक, तिरंगा चौक, गुरुदेव नगर चौक मार्गे वाहतूक वळवली जाईल.
- गुरुदेवनगर चौकतून भांडे प्लॉट चौकाकडे जाणारी वाहतूक तिरंगा चौक, सक्करदरा चौक, छोटा ताजबाग मार्ग जातील.
