07 July 2020

News Flash

करोना नियंत्रणासाठी शासनाकडून केवळ ५० लाखांचा निधी

करोनाचा प्रादुर्भाव नियंत्रित करण्यासाठी अधिकच्या उपाययोजना करण्याची गरज आहे.

नाशिक : शहर, परिसरात मोठय़ा प्रमाणावर करोना विषाणुचा प्रादुर्भाव वाढत असून रुग्णसंख्येने दोन हजाराचा टप्पा ओलांडला आहे. मृतांची संख्या देखील १०४ हून अधिक झाली आहे. करोना नियंत्रणासाठी शासनाने आतापर्यंत केवळ ५० लाखाचा निधी दिला आहे. महापालिका स्वखर्चातून करोनाचा प्रतिकार करत आहे.

करोनाचा प्रादुर्भाव नियंत्रित करण्यासाठी अधिकच्या उपाययोजना करण्याची गरज आहे. यासाठी लागणारा खर्च महाराष्ट्र शासनाने नाशिक महानगरपालिकेस द्यावा, अशी मागणी भाजपच्या आमदार देवयानी फरांदे यांनी मुख्यमंत्री, उपमुख्यमंत्री आणि पालकमंत्र्यांकडे केली आहे.

करोनाचा प्रादुर्भाव रोखण्यासाठी शहरात ५०० खाटा वाढविणे आणि शहराची गरज लक्षात घेता ५० व्हेंटिलेटरची व्यवस्था तातडीने करणे गरजेचे आहे. करोनाबाधितांची तपासणी करण्यासाठी कोविड केंद्रांची संख्या वाढवावी लागेल. याशिवाय इतरही उपाय करण्याची निकड असल्याकडे आ. फरांदे यांनी लक्ष वेधले. सद्यस्थितीत शहरात केवळ २०० ते २५० संशयितांच्या नमुन्यांची तपासणी केली जाते. रुग्णसंख्या वाढत असल्याने दररोज किमान एक हजार संशयितांची तपासणी आवश्यक आहे. या उपाययोजनांसाठी महापालिकेला आर्थिक मदतीची निकड असून शासनाने ती तातडीने द्यावी, असे आमदार फरांदे यांनी सांगितले.

महाविकास आघाडीला खिंडीत गाठण्याचा प्रयत्न

निधीच्या मुद्यावरून महापालिकेतील सत्ताधारी भाजपने राज्यातील महाविकास आघाडी सरकारला खिंडीत गाठण्याचा प्रयत्न चालविला आहे. मुंबई, पुणे आणि इतर शहरांप्रमाणे नाशिकमध्ये करोनाचे रुग्ण वाढत आहेत. शासनाकडून पुरेसा निधी दिला जात नसल्याचा मुद्दा या माध्यमातून भाजपने समोर आणला. शहरात भाजपचे तीन आमदार असून महापालिका याच पक्षाच्या ताब्यात आहे. राज्यात सत्तान्तर झाल्यानंतर महापालिकेतील राजकारणात बदल झाले. महाविकास आघाडीतील सर्व घटक पक्ष भाजपला वारंवार अडचणीत आणत आहेत. निधीच्या मुद्यावरून भाजप राज्यातील सत्ताधाऱ्यांना जबाबदार धरण्याच्या तयारीत आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on July 1, 2020 3:01 am

Web Title: only rs 50 lakh from the government for corona control zws 70
Next Stories
1 इंधन दरवाढीने भाज्या महाग
2 नाशिकमध्ये कडक लॉकडाउन, छगन भुजबळ यांची घोषणा
3 Coronavirus : नाशिक पूर्व, पंचवटी विभागात करोनाचा अधिक प्रादुर्भाव
Just Now!
X