जळगाव : सहकारी डॉक्टर महिलेशी गैरवर्तन आणि जन्म-मृत्यू विभागात पत्नीच्या जागेवर पतीला रूजू करून घेण्याचे आरोप झाल्याने महापालिकेचे मुख्य वैद्यकीय अधिकारी डॉ. विजय घोलप काही दिवसांपासून वादाच्या भोवऱ्यात सापडले होते. त्यांच्याविषयी अनेक तक्रारी करण्यात आल्या होत्या. आयुक्त ज्ञानेश्वर ढेरे यांनी अखेर त्यांच्या निलंबनाचे आदेश काढले असून, महापालिकेच्या कर्मचाऱ्यांमध्ये त्यामुळे चांगलीच खळबळ उडाली आहे.
सहकारी डॉक्टर महिलेशी गैरवर्तन केल्याचे आरोप झाल्याने महापालिकेचे मुख्य वैद्यकीय अधिकारी डॉ. घोलप यांना यापूर्वीच कारणे दाखवा नोटीस बजावण्यात आली होती. त्याविषयी तीन दिवसात त्यांना उत्तर मागण्यात आले होते. प्रत्यक्षात, सोमवारी महापालिकेने थेट निलंबनाचे आदेश काढून डॉ. विजय घोलप यांना मोठा दणका दिला. याशिवाय, महापालिकेच्या जन्म-मृत्यू नोंदणी विभागातही डॉ. घोलप यांच्या पराक्रमामुळे नुकताच एक धक्कादायक प्रकार उघडकीस आला होता.
या विभागात मुख्यमंत्री कार्य प्रशिक्षण योजनेअंतर्गत नियुक्त असलेल्या एका महिलेच्या जागी प्रत्यक्षात तिचा पती कर्तव्य बजावत असल्याची माहिती समोर आली होती. या प्रकाराची चौकशी गेल्या काही महिन्यांपासून सुरू असताना तीन सदस्यीय चौकशी समितीने त्यासंदर्भातील अहवाल महापालिका आयुक्त ज्ञानेश्वर ढेरे यांच्याकडे सादर केला. तक्रारीचा प्राथमिक अहवाल विशाखा समितीने आयुक्तांना दिल्यानंतर दोन्ही प्रकरणांची गंभीर दखल घेत आयुक्त ढेरे यांनी डॉ. विजय घोलप यांना दोषी ठरवून तत्काळ निलंबित करण्याचे आदेश काढले.
या व्यतिरिक्त, महापालिकेतील मुख्य वैद्यकीय अधिकारी डॉ. घोलप यांचे अनेक कारनामे आता समोर येत आहेत. त्यात जन्म दाखल्यातील घोळाचाही समावेश असल्याचे सांगितले जात आहे. त्यासंदर्भात माजी नगरसेवक प्रशांत सोनवणे यांनी पुराव्यासह आयुक्तांकडे तक्रार केली होती. पदाचा दुरूपयोग करून डॉ. घोलप हे जन्म दाखल्यांमधील आडनाव, वडिलांचे नाव परस्पर बदलून देत असल्याचा दावा माजी नगरसेवक सोनवणे यांनी केला होता. या सर्व प्रकरणांमुळे वादग्रस्त ठरलेले महापालिकेचे मुख्य वैद्यकीय अधिकारी घोलप यांना निलंबित करण्याचा निर्णय आयुक्त ज्ञानेश्वर ढेरे यांनी घेतला. आता घोलप यांची खातेनिहाय चौकशी केली जाणार असून, त्यानंतर त्यांना महापालिकेच्या सेवेत ठेवायचे की नाही, त्याबाबतीत निर्णय होण्याची शक्यता आहे.
दरम्यान, डॉ. घोलप यांच्या कार्यपद्धतीविषयी अनेक तक्रारी करून सुद्धा त्यांच्यावर कार्यवाही होत नसल्याचा आरोप करीत सर्वपक्षीय शिष्टमंडळाने आयुक्त ज्ञानेश्वर ढेरे यांच्या दालनात काही दिवसांपूर्वी ठिय्या आंदोलन केले होते. यावेळी डॉ. घोलप यांना सेवेतून बडतर्फ करावे, अशी मागणीही करण्यात आली होती. डॉ. घोलप यांच्या गैरवर्तवणुकीचे अनेक कारनामे उघड झाले असून सुद्धा त्यांना बडतर्फ केले जात नसल्याने शिवसेनेचे जिल्हाप्रमुख कुलभूषण पाटील यांच्यासह शिष्टमंडळाने आयुक्त ढेरे यांच्यावर संताप व्यक्त केला होता.
