जळगाव : सभागृहात ऑनलाइन रमी खेळल्याने वादाच्या भोवऱ्यात सापडलेले तत्कालिन कृषिमंत्री माणिकराव कोकाटे यांना गेल्या महिन्यात धुळे जिल्ह्यात काळे झेंडे दाखविण्यात आले होते. त्यामुळे धास्तावलेल्या मंत्री कोकाटे यांनी त्या दिवसाचा जळगाव जिल्हा दौरा अचानक रद्द करण्याचा निर्णय घेतला होता. त्यानंतर आता पुन्हा कोकाटे यांचा दौरा कार्यक्रम जळगाव जिल्हा प्रशासनाला प्राप्त झाला आहे. अजित पवार गटाच्या रविवारी आयोजित मेळाव्यास ते उपस्थित राहणार आहेत.
वादग्रस्त विधानांमुळे आधीच चर्चेत असलेले मंत्री माणिकराव कोकाटे सभागृहाचे कामकाज चालू असताना भ्रमणध्वनीवर ऑनलाईन तीन पत्ती रमी खेळत असल्याची चित्रफीत सगळीकडे चांगलीच गाजली. विरोधकांनी त्यानंतर कोकाटे यांच्या राजीनाम्याची मागणी केल्यावर मुख्यमंत्री देवेंद्र फडणवीस यांच्यासह राष्ट्रवादीचे (अजित पवार) राष्ट्रीय अध्यक्ष व उपमुख्यमंत्री अजित पवार यांचीही कोंडी झाली होती. दरम्यान, मंत्री कोकाटे हे शिंदखेडा तालुक्यात एका पेट्रोल पंपाच्या उद्घाटनासाठी गेले होते. धुळे जिल्ह्यात आधीच समाधानकारक पाऊस नसल्याने शेतकऱ्यांवर दुबार पेरणीचे संकट ओढवले असताना, कांदा तसेच कापूस उत्पादकांची विचारपूस करण्यासाठी शेतांच्या बांधावर न जाता खासगी पेट्रोल पंपाच्या उद्घाटनासाठी कृषिमंत्र्यांना कसा वेळ मिळतो, असा जाब त्यांना शरद पवार गटासह ठाकरे गटाने त्यांना विचारला होता.
मंत्री कोकाटे हे धुळ्यात थांबलेल्या हॉटेलच्या बाहेरही काळे झेंडे दाखवून त्यांच्या विरोधात निदर्शने करण्यात आली. शेतकऱ्यांच्या विरोधात वारंवार अपमानास्पद वक्तव्य करणाऱ्या कृषिमंत्र्यांची पक्षाध्यक्ष अजित पवार यांनी हकालपट्टी करावी, अशीही मागणी आंदोलकांनी केली. तसेच त्यांना बराच वेळ हॉटेलच्या बाहेर पडू दिले नाही. शिंदखेडा तालुक्यातील पेट्रोल पंपाचे उद्घाटन पार पडल्यानंतर कोकाटे दुपारी साडेतीनच्या सुमारास जळगाव जिल्ह्यातील चोपडा शहराकडे प्रस्थान करणार होते. त्यानुसार, मंत्री कोकाटे यांच्या दौऱ्याचे नियोजन जळगाव जिल्हा प्रशासनाला प्राप्तही झाले होते. परंतु, धुळे जिल्ह्यातील शिंदखेडा तालुक्यातच महाविकास आघाडीच्या विरोधाला तोंड द्यावे लागल्याने, कोकाटे यांनी चोपडा तालुक्याचा दौरा रद्द करण्याचा तडकाफडकी निर्णय घेतला. मंत्री कार्यक्रमासाठी उपस्थित राहणार असल्याने अजित पवार गटाच्या पदाधिकाऱ्यांनी इकडे जय्यत तयारी करून ठेवली होती. कार्यक्रमाच्या निमंत्रण पत्रिकाही वाटून झाल्या होत्या. प्रत्यक्षात, मंत्रीच कार्यक्रमाला येणार नाही म्हटल्यावर अजित पवार गटाच्या पदाधिकाऱ्यांचा मोठा हिरमोड झाला होता.
राज्यात मधल्या काळात बऱ्याच वेगवान घडामोडी घडल्या. विरोधकांकडून थेट राजीनाम्याची मागणी केली जात असताना, महायुतीने माणिकराव कोकाटे यांच्याकडील कृषी खाते काढून घेतले. आणि त्यांच्याकडे तुलनेने कमी महत्व असलेले क्रीडा खाते सोपवले. त्यानंतर आता कोकाटे हे पुन्हा जळगाव दौऱ्यावर येत असून, त्यांचा दौरा कार्यक्रम जिल्हा प्रशासनाला प्राप्त झाला आहे. विशेष म्हणजे या वेळीही ते नंदुरबार जिल्ह्यातील शहादा येथून मोटारीने जळगावकडे प्रयाण करणार आहेत. गेल्या वेळचा अनुभव लक्षात घेता त्यांचा या वेळचा दौरा सर्वत्र चर्चेचा विषय ठरला आहे. जळगावमध्ये रविवारी उपमुख्यमंत्री अजित पवार यांच्या उपस्थितीत राष्ट्रवादीच्या मेळाव्याचे आयोजन करण्यात आले आहे. त्या ठिकाणी मंत्री कोकाटे यांच्यासह छगन भुजबळ, नरहरी झिरवळ, प्रदेशाध्यक्ष सुनील तटकरे, माजी मंत्री नवाब मलीक आदी उपस्थित राहणार आहेत.
