जळगाव : कृषिक्षेत्रात पाईप आणि ठिबकच्या माध्यमातून पाणी बचतीतून समृद्धी घडविण्यासाठी मोलाची भूमिका निभावणाऱ्या येथील जैन इरिगेशन सिस्टम्स लिमिटेड, या कंपनीला प्लेक्स कॉन्सिलतर्फे आठ निर्यात पुरस्कार प्रदान करण्यात आले आहेत.
मुंबई येथील हॉटेल द लीला येथे सदरचे पुरस्कार केंद्रीय वाणिज्य मंत्री पीयूष गोयल यांच्या हस्ते जैन इरिगेशनचे उपाध्यक्ष अनिल जैन यांनी वरिष्ठ सहकारी डॉ. अनिल पाटील, व्ही. एम. भट, डॉ. बालकृष्ण यादव, राजेंद्र महाजन, एस. एन. पाटील, के. बी. सोनार, सुचिता केरावंत, दिपा शिवदे यांच्यासोबर स्वीकारले.
प्लास्टिक एक्सपोर्ट प्रमोशन कौन्सिलच्या (प्लेक्स कॉन्सिल) वतीने देण्यात येणाऱ्या या पुरस्कारामध्ये जैन इरिगेशनने हॅट्रीक केली आहे. भारतीय प्लास्टिक उद्योगातील उत्कृष्टतेची ७० वर्षे साजरी करत असताना त्यात उत्कृष्ट कामगिरी करणाऱ्यांचा हा सन्मान सोहळा होता. प्लेक्स कौन्सिल प्लॅटिनम ज्युबिली सेलिब्रेशन आणि एक्सपोर्ट एक्सलन्स अवॉर्ड्स सोहळ्यासाठी ज्येष्ठ उद्योजक एम. पी. तापडिया, विधानसभेचे अध्यक्ष राहुल नार्वेकर, रविश कामत, प्लेक्स कौन्सिलचे अध्यक्ष विक्रम बधोरीया, उपाध्यक्ष सचिन शहा, हेमंत मेनोचा, श्रीबश दशमोहपात्रा यांची उपस्थिती होती.
जैन इरिगेशन कंपनीची २०२३-२४ आणि २०२४-२५ वर्षांसाठी पाईप्स आणि होसेस (प्लास्टिकच्या) फिटिंग्ज श्रेणीमध्ये निर्यात उत्कृष्टता पुरस्कार प्राप्तकर्ता म्हणून निवड झाली. त्यात जैन ठिबक सिंचन विभागामध्ये निर्यातीसाठी २०२३-२४ साठी प्रथम पारितोषिक, फिटींग्ज पाईप होसेस विभागात द्वितीय क्रमांक, पाईप होसेस विभागात प्रथम क्रमांक, पीव्हीसी फोम शीट विभागातील निर्यातीमुळे प्रथम क्रमांकाचे पारितोषिक कंपनीला मिळाले. तर २०२४-२५ साठी ठिबक सिंचनमध्ये प्रथम पारितोषिक मिळाले.
फिटिंग्ज पाईप आणि होसेस विभागात द्वितीय, पाईप होसेसमध्ये उत्कृष्ट निर्यातीसाठी द्वितीय तर पीव्हीसी फोम शीट विभागात सलग प्रथम क्रमांचे पारितोषिक कंपनीला मिळाले. यावेळी मुंबई कार्यालयातील एकनाथ महाकाळ, किसन वरे, शिवा तुपे यांनी पुरस्कार सोहळ्यासाठी समन्वय साधला. विक्रम बधोरिया, राहुल नार्वेकर यांनी मनोगत व्यक्त केले.
प्लेक्स कौन्सिल ही भारत सरकारच्या वाणिज्य आणि उद्योग विभागाद्वारे १९५५ मध्ये स्थापन करण्यात आलेली संस्था आहे. भारतातील प्लास्टिकमधील वेगवेगळ्या क्षेत्रातील निर्यातीत सर्वोत्कृष्ट कार्य करणाऱ्या उद्योगांना प्लेक्स कौन्सिल पुरस्कार देते. मानचिन्ह, प्रमाणपत्र, असे या पुरस्काराचे स्वरुप असते. जैन इरिगेशन सिस्टिम्स् लिमिटेडचा प्लास्टिक उत्पादनांच्या गुणवत्तापूर्ण उत्पादन आणि निर्यातीबद्दल प्लेक्स कौन्सिलतर्फे १९९१ पासून दरवर्षी सन्मान होत आला आहे.
प्लास्टिक एक्सपोर्ट प्रमोशन कौन्सिलने मुंबईत निर्यात उत्कृष्टता पुरस्कारांचे आयोजन केले. हा प्रोत्साहनपर सोहळा पंतप्रधान नरेंद्र मोदी यांच्या भारताच्या उत्पादन आणि निर्यात क्षमतांना बळकटी देण्याच्या दृष्टिकोनाशी सुसंगत आहे. मेक इन इंडिया सारख्या उपक्रमांना, प्लास्टिक क्षेत्रात शाश्वतेतून अर्थव्यवस्थेला प्रोत्साहन देते. जगाशी स्पर्धा करीत भारताने प्लास्टिक क्षेत्राला तांत्रिक उत्कृष्टता आणि शाश्वत विकासाचे केंद्र म्हणून स्थान दिले आहे, असे केंद्रीय मंत्री पीयूष गोयल म्हणाले.
