जळगाव – शहरालगतच्या जैन हिल्सवरील अनुभूती मंडपममध्ये ३८ व्या राष्ट्रीय बुद्धिबळ अजिंक्यपद स्पर्धेचे दोन ते आठ ऑगस्ट दरम्यान आयोजन करण्यात आले आहे. स्वीग लीगमध्ये खेळविण्यात येणाऱ्या ११ वर्षाखालील मुले-मुलींच्या या बुद्धिबळ महासंग्रामाची जय्यत तयारी करण्यात आली आहे. तब्बल २७५ टेबलांवर देशभरातील बुद्धिबळपटू त्यांच्या चाली खेळणार आहेत.
जळगाव जिल्हा बुद्धिबळ असोसिएशन आणि जैन स्पोर्ट्स अकॅडमी यांच्या संयुक्त विद्यमाने तसेच महाराष्ट्र राज्य बुद्धिबळ संघटनेच्या मान्यतेने आणि अखिल भारतीय बुद्धिबळ महासंघाच्या मार्गदर्शनाखाली आयोजित ही स्पर्धा जैन इरिगेशनने प्रायोजित केली आहे. केंद्रीय क्रीडा व युवक कल्याण राज्यमंत्री रक्षा खडसे, खासदार स्मिता वाघ यांच्या हस्ते शनिवारी दुपारी दोन वाजता स्पर्धेचे उद्घाटन होईल. यावेळी जैन इरिगेशन सिस्टीम्सचे अध्यक्ष तथा अखिल भारतीय बुद्धिबळ संघटनेचे सल्लागार अशोक जैन, महाराष्ट्र बुद्धिबळ असोसिएशनचे कार्यकारी अध्यक्ष सिद्धार्थ मयूर, जळगाव जिल्हा बुद्धिबळ असोसिएशनचे व जैन स्पोर्टस अॅकडमीचे अध्यक्ष अतुल जैन, जळगाव बुद्धिबळ असोसिएशनचे सचिव नंदलाल गादीया आदी असतील.
या बुद्धिबळ स्पर्धेत अंदमान निकोबारसह आंध्र प्रदेश, आसाम, बिहार, चंदिगड, छत्तीसगड, दिल्ली, गोवा, गुजरात, केरळ, मध्य प्रदेश, महाराष्ट्र, तामिळनाडू, तेलंगणा, कर्नाटक, पंजाब, राजस्थान राज्यातील ५५० पेक्षा जास्त खेळाडू स्पर्धेत सहभागी होणार आहेत. त्यात फिडे मानांकन प्राप्त ४०० खेळाडूंचा समावेश आहे. पैकी मुलांमध्ये प्रथम मानांकित पुण्याचा अद्विक अग्रवाल (२२५१), मुलींमध्ये केरळची देवी बीजेस (१८६९) यांच्यासह अनेक खेळाडू हे आशियाई व जागतिक स्पर्धांमध्ये सहभाग घेतलेले खेळाडू आहेत. या राष्ट्रीय स्पर्धेद्वारा आंतरराष्ट्रीय मानांकन प्राप्त करण्याची संधी खेळाडुंना मिळणार आहे.
११ फेऱ्यांमध्ये २७५ बुद्धिबळ पटांवर भव्य स्वरूपात ही स्पर्धा रंगणार आहे. ११ वर्षांखालील मुले-मुलींच्या ३८ व्या राष्ट्रीय स्पर्धेत एकूण आठ लाखाची बक्षिसे देण्यात येणार आहेत. वैयक्तिक स्वरुपाचे विजयी, पराजित व बरोबरीत असणाऱ्या सर्व खेळाडूंना रोख स्वरूपात विशेष पारितोषिके त्यांच्या खेळाच्या मुल्यांकनानुसार दिली जाणार आहेत. अशा प्रकारची बक्षिसे फक्त जळगावातून जैन इरिगेशन सिस्टीम्सच्या माध्यमातून दिली जातात.
