Counterfeit Notes : मालेगावात नव्याने ५ लाख ४३ हजाराच्या नकली नोटा जप्त ; दोघे जेरबंद

शहरातील गजबजलेल्या तांबा काटा भागातून किल्ला पोलिसांनी दोघा संशयीतांना बनावट नोटा चलनात आणण्याचा प्रयत्न करीत असताना पकडले. पोलिसांनी त्यांची झडती घेतली असता या दोघांकडे पाचशे रुपयांच्या बनावट नोटा आढळून आल्या. मोजदाद केली असता एकूण पाच लाख ४३ हजार ५०० रुपयांचे नकली चलन व १३ हजार रुपये खऱ्या चलनाच्या नोटा त्यांच्याकडे आढळून आल्या. हा सर्व मुद्देमाल पोलिसांनी जप्त केला आहे. धनराज नारायण धोटे (२०) व राहुल कृष्णराव आंबटकर (२५) अशी या दोघांची नावे असून ते वर्धा जिल्ह्यातील रहिवाशी आहेत. या प्रकरणी किल्ला पोलिसांनी गुन्हा दाखल करून दोघांना अटक केली.

जिल्हा पोलीस अधीक्षक बाळासाहेब पाटील,अप्पर पोलीस अधीक्षक तेगबीर सिंग संधू व सहाय्यक पोलीस अधीक्षक दर्शन दुगड यांच्या मार्गदर्शनाखाली पोलीस निरीक्षक सुधीर पाटील,उपनिरीक्षक भूषण चव्हाण, हवालदार सचिन चव्हाण, पंकज भोये, आनंद चव्हाण, विशाल तावडे यांच्या पथकाने ही कारवाई केली आहे. उपनिरीक्षक भूषण चव्हाण हे याप्रकरणी अधिक तपास करीत आहेत.

पंधरा दिवसांपूर्वी मालेगाव तालुका पोलिसांनी पाचशे रुपयांच्या दोन हजार नोटा म्हणजे १० लाखांच्या नकली चलनासह मौलाना महंम्मद जुबेर व नाझीर अक्रम अन्सारी या मध्य प्रदेशच्या बऱ्हाणपूर येथील दोघांना पकडले होते. नकली चलन रॅकेटची मोठी व्याप्ती असल्याचे तसेच मध्यप्रदेश व महाराष्ट्र या दोन राज्यांमध्ये त्याचे नेटवर्क पसरल्याचे पोलीस तपासात समोर आले. संशयीतांकडून आपल्या हस्तकांना निम्म्या किंमतीत या बनावट नोटा विक्री करण्यात येत होत्या व त्यानंतर हस्तक या नोटा चलनात आणत असल्याचेही तपासात निष्पन्न झाले.

प्रारंभी पकडण्यात आलेल्या दोघांनी यापूर्वी अशा नोटा चलनात आणण्यासाठी मालेगावमधील तौसिफ अंजुम अन्सारी याला दिल्याची कबुली दिल्यावर तौसिफ यालाही अटक करण्यात आली. तौसिफ याने चांदवड येथील अमजद शहाबुद्दीन कोतवाल यालाही दीड लाखाचे नकली चलन दिल्याचे सांगितले. त्यानंतर पोलिसांनी अमजदला देखील अटक केली.

मौलाना महंमद हा मध्यप्रदेशातील खंडवा जिल्ह्यातील पैठिया गावामधील मशिदीमध्ये इमाम आहे. मालेगाव पोलिसांनी त्याला पकडल्यावर मध्य प्रदेश पोलिसांनी त्याचे वास्तव्य असलेल्या मदरशामधील खोलीवर छापा टाकला असता तेथे पाचशे रुपयांच्या १९ लाख ७८ लाखांच्या बनावट नोटा आढळून आल्या.

मौलाना महंमद याला डॉ. प्रतीक नवलखा हा नकली नोटा देत असल्याची माहिती समजली. डॉ.नवलखा हा बऱ्हाणपूर येथील जिल्हा रुग्णालयात निवासी वैद्यकीय अधिकारी असताना त्याच्या विरोधात आर्थिक घोटाळ्याप्रकरणी गुन्हा दाखल झाला होता. त्यामुळे त्याला सेवेतून निलंबित करण्यात आले आहे.

नकली चलन रॅकेटमध्ये तोच मास्टरमाईंड असल्याचा पोलिसांचा संशय आहे. या प्रकरणात यापूर्वी चार जणांना अटक झाली असून डॉ.नवलखा व त्याचा आणखी एक साथीदार अद्याप फरार आहे. नकली नोटा चलनात आणणाऱ्या मध्य प्रदेशातील रॅकेटचा व आताच्या प्रकरणात पकडण्यात आलेल्या वर्धा येथील दोघा संशयीतांचा काही संबंध आहे का, याचा पोलीस शोध घेत आहेत.