नाशिकच्या रस्त्यांवर एका दिवसामुळे धावणार इतकी वाहने…

दसरा आणि दिवाळीला खरेदी ही शुभ मानली जात असल्याने अनेक जण या सणांवेळी कोणती ना कोणती खरेदी करतात. कोणी वाहनांची, तर कोणी घरांची, कोणी सोने खरेदी करतात. यंदाच्या दसऱ्यावर अतिवृष्टीने झालेल्या नुकसानीचे सावट असल्याचे म्हटले जात होते. त्यामुळे व्यावसायिकही धास्तावले होते. अर्थात, अतिवृष्टीमुळे पिकांच्या झालेल्या नुकसानीचा परिणाम ग्रामीण भागात जाणवला. ग्रामीण भाग अजूनही नुकसानीच्या धक्क्यातून सावरलेला नाही. त्यामुळे दसरा ग्रामीण भागातील व्यावसायिकांसाठी निराशाजनकच गेला.

नाशिक शहरात मात्र खरेदीची धूम उडाली. अनेक वस्तूंवरील जीएसटी कमी होणे तसेच विविध कंपन्यांकडून मोठ्या प्रमाणावर सवलती जाहीर केल्याने त्याचा परिणाम दसऱ्याच्या दिवशी खरेदी वाढण्यावर झाला. सर्वाधिक तेजी वाहन बाजारात दिसून आली. दसऱ्याला सकाळपासून वाहनांच्या दालनांसमोर अभूतपूर्व गर्दी झाली होती. ग्राहकांच्या या प्रतिसादामुळे व्यावसायिकही हरखून गेले होते. काही मोटारी शिल्लकच नसल्याने त्या दसऱ्याला देता येत नसल्याचेही त्यांनी सांगितले. त्यामुळे काही ग्राहकांची निराशाही झाली.

नाशिकमध्ये ग्राहकांच्या गर्दीमुळे वाहन बाजार ओसंडून वाहत असल्याने नवीन मोटार घेऊन बाहेर पडणेही अवघड जात होते. नाशिकमध्ये दसऱ्यानिमित्त विक्री झालेल्या मोटारींची संख्या ११०० पर्यंत गेली. त्यात ५० लाखांवरील १६ मोटारींचा समावेश आहे. नव्या चकचकीत मोटारीचे भलामोठा हार घालून स्वागत करण्यात येत होते. या हाराची किंमतही एक ते तीन हजार रुपयांदरम्यान होती. दुचाकी विक्रीही सुसाट झाली. साडेतीन हजाराहून अधिक दुचाकींची विक्री झाल्याचा अंदाज व्यावसायिकांनी वर्तविला आहे. मागील वर्षाच्या दसऱ्यापेक्षा यंदाचा दसरा वाहन बाजारासाठी दसरा सण मोठा, नाही आनंदा तोटा असा लाभदायक ठरला.