नाशिक : सेवा पंधरवडा उद्घाटनात विविध लाभांचे वितरण

यावेळी खा. भास्कर भगरे, आमदार प्रा. देवयानी फरांदे, आ. ॲड. राहुल ढिकले, विभागीय आयुक्त डाॅ. प्रवीण गेडाम, जिल्हाधिकारी जलज शर्मा, महानगरपालिका आयुक्त मनीषा खत्री, जिल्हा परिषदेचे मुख्य कार्यकारी अधिकारी ओमकार पवार आदी उपस्थित होते. यावेळी राष्ट्रीय आरोग्य अभियानांतर्गत स्वस्थ नारी – सशक्त परिवार अभियानाचा शुभारंभ झाला. पंतप्रधान नरेंद्र मोदी यांच्या हस्ते मध्य प्रदेशातील धार येथे झालेल्या कार्यक्रमाचे थेट प्रक्षेपण यावेळी दाखविण्यात आले.

यावेळी मंत्री महाजन यांनी मार्गदर्शन केले. पंतप्रधान नरेंद्र मोदी यांच्या नेतृत्वाखाली देशात गरिबांच्या कल्याणासाठी विविध योजनांची प्रभावीपणे अंमलबजावणी करून त्यांच्या जीवनात परिवर्तन घडवून आणण्यात येत असल्याचे त्यांनी सांगितले. सेवा पंधरवडय़ात तीन टप्प्यात कार्यक्रम होणार आहेत. २०२७ पर्यंत एकही नागरिक घरापासून वंचित राहणार नाही. प्रत्येकाला हक्काचे घर मिळेल. याबरोबरच पाणीपुरवठा, शौचालय, सौर ऊर्जेचा लाभ देण्यात येईल. आरोग्य विमा, उज्ज्वला गॅस योजना, मोफत धान्य देण्यात येत आहे. त्याबरोबरच आता स्वस्थ नारी सशक्त परिवार अभियान राबविण्यात येत आहे. त्याचा महिलांनी लाभ घ्यावा, असे आवाहन महाजन यांनी केले. आमदार फरांदे यांनीही सेवा पंधरवड्यानिमित्त आयोजित उपक्रमांचा नागरिकांनी लाभ घ्यावा, असे सांगितले.

जिल्हाधिकारी शर्मा यांनी, सेवा पंधरवड्यानिमित जिल्ह्यात पाणंद रस्ते मोकळे करणे, ग्रामीण भागातील रस्त्यांना संकेतांक देणे, सर्वासाठी घरे मोहीम, आयुषमान कार्डचे वितरण, स्वच्छता मोहीम आदी उपक्रम घेण्यात येणार असल्याचे सांगितले. तहसीलदार मंजुषा घाटगे यांनी सूत्रसंचालन केले. आभार डाॅ. निलेश पाटील यांनी मानले.

पोषण पाककृतीवर प्रदर्शन

नाशिक जिल्हा शासकीय रुग्णालय, नर्सिंग तसेच आहार विभागाच्या वतीने स्वस्थ नारी -सशक्त परिवार या उपक्रमाअंतर्गत महाकवी कालिदास कलामंदिर येथे पोषण पाककृतींवर प्रदर्शन भरविण्यात आले होते. घरातील खाद्यपदार्थ, जिन्नस वापरत कमी खर्चात चविष्ट खाद्यपदार्थ कशा तयार करता येतात, याविषयी विविध पाककृती सादर करण्यात आल्या. तसेच जिन्नसांचे औषधी bगुणधर्मांची माहिती फलकाद्वारे देण्यात आली. प्रदर्शनाची मंत्री महाजन यांनी पाहणी केली.