नाशिकरोड पुन्हा चर्चेत…

नाशिकरोड येथील आयनाॅक्स मल्टिप्लेक्सजवळ ‘हॉटेल नाशिक इन’ आहे. या हाॅटेलमध्ये एमडी या अमली पदार्थाची होत असल्याची माहिती मिळाल्यानंतर पोलीस आयुक्त संदीप कर्णिक, गुन्हे शाखेचे उपायुक्त किरणकुमार चव्हाण, सहायक आयुक्त संदीप मिटके यांच्या मार्गदर्शनाखाली अमली पदार्थ विरोधी पथक, उपनगर आणि नाशिक रोड पोलिसांचे संयुक्त पथक तयार करण्यात आले.

वरिष्ठ निरीक्षक सुशीला कोल्हे, नाशिक रोड पोलीस ठाण्याचे वरिष्ठ निरीक्षक जितेंद्र सपकाळे, उपनगर पोलीस ठाण्याचे वरिष्ठ निरीक्षक जयंत शिरसाठ यांच्या नेतृत्वाखाली पथकाने छापा टाकला. यावेळी हाॅटेलमधील रूम क्र. ३०५ मध्ये तीन संशयित आढळले. त्यांच्या ताब्यातून ३२ ग्रॅम एमडी पावडर व साहित्य असा दोन लाख २३,३८० रुपयांचा मुद्देमाल जप्त करण्यात आला. संशयितांमध्ये शोएब खान (३९, रा. हॅपी कॉलनी, वडाळा), शेख मुस्तफा अफजल (१९, रा. खोडेनगर), मोहफीज खान (१९, रा. वडाळा चौक) आणि हॉटेल मालक कपिल देशमुख यांचा समावेश आहे. मुख्य सूत्रधार शोएब खान याने चौकशीत एमडी विक्रीसाठी दिल्याची कबुली दिल्याने, तसेच हॉटेल मालक देशमुख याचाही या व्यवहारात सहभाग असल्याचे निष्पन्न झाल्याने त्यालाही आरोपी करण्यात आले.

या कारवाईत सहायक निरीक्षक सत्यवान पवार, सचिन चौधरी, विशाल पाटील, प्रवीण सूर्यवंशी, उपनिरीक्षक प्रभाकर सोनवणे, तसेच सहायक उपनिरीक्षक देवकिसन गायकर, रंजन बेंडाळे, संजय ताजणे आणि कर्मचारी भारत डंबाळे, बळवंत कोल्हे, संतोष सौंदाणे यांनी सहभाग नोंदविला.

नाशिकरोड एमडीमुळे चर्चेत

काही वर्षापूर्वी मुंबई येथील साकीनाका पोलिसांनी नाशिक तालुक्यातील पळसेजवळील जाखोरी परिसरात एमडी पदार्थ साठा मोठ्या प्रमाणावर जप्त केला होता. यानंतर नाशिकरोड पोलिसांनी केलेल्या कारवाईत ललित पाटील यांचा कारखाना उदध्वस्त करण्यात आला होता. यामुळे नाशिकरोड परिसर एमडीमुळे चर्चेत आला.. या प्रकरणाचे धागेदोरे हे आमदारांपर्यंत पोहचले होते. विरोधकांकडून वेगवेगळे आरोप करण्यात आले. यानंतर अमली पदार्थ पथकाने सातत्याने कारवाई करुन मोठ्या प्रमाणावर एमडी जप्त केले आहे.